सेतो खबर
धनगढी । कैलालीमा प्रेमीसँग मिलेर श्रीमानको हत्या गरेको आरोपमा प्रहरीले मृतककी श्रीमतीसहित पाँच जनालाई पक्राउ गरेको छ।
लम्कीचुहा नगरपालिका–४ का ३४ वर्षीय दीपक सुनारको हत्या प्रकरणमा उनकी श्रीमती यमुना सुनारसहित पाँच जनालाई प्रहरीले विभिन्न स्थानबाट पक्राउ गरेको हो।
पक्राउ पर्नेमा मृतककी श्रीमती यमुना सुनार, उनका प्रेमी लम्कीचुहा नगरपालिका–१० का दुर्योधन सुवर्णकार, टीकापुरका रामराजेश महतो तथा कञ्चनपुरको बेलौरी नगरपालिका–कलकत्ता क्षेत्रका भीमा राना र वीरेन्द्र राना रहेका छन्।
जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) योगेन्द्र तिमिल्सिनाका अनुसार पक्राउ परेका पाँचै जनालाई नियन्त्रणमा राखेर घटनाबारे थप अनुसन्धान भइरहेको छ।
प्रहरीको प्रारम्भिक अनुसन्धानअनुसार यमुनाले आफ्ना प्रेमी दुर्योधन सुवर्णकारसँग मिलेर श्रीमान् दीपक सुनारको हत्या गर्ने योजना बनाएको खुलेको छ। योजनाअनुसार यमुनाले दीपकलाई अरामवतीको जंगलमा बोलाएको र त्यहाँ पुगेपछि धारिलो हतियार प्रहार गरी हत्या गरिएको प्रारम्भिक अनुसन्धानबाट खुलेको प्रहरीले जनाएको छ।
हत्या गरेपछि घटना लुकाउने उद्देश्यले शवलाई टुक्राटुक्रा पारिएको र कर्णाली नदीमा बगाइएको प्रारम्भिक बयान पक्राउ परेकाहरूले दिएको प्रहरीको भनाइ छ।
प्रहरीका अनुसार घटनामा अन्य व्यक्तिको संलग्नता रहे–नरहेको, हत्या कसरी र कुन अवस्थामा गरिएको थियो तथा शव व्यवस्थापनमा को–को संलग्न थिए भन्ने विषयमा अनुसन्धान भइरहेको छ।
पक्राउ परेका व्यक्तिहरूमाथि थप सोधपुछ तथा घटनासँग सम्बन्धित प्रमाण संकलनको काम भइरहेको प्रहरीले जनाएको छ। प्रहरीले अनुसन्धान पूरा भएपछि घटनाको विस्तृत विवरण सार्वजनिक गर्ने तयारी गरेको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
