बालेन सरकारको प्रारम्भ नै मान्छे मार्ने र षड्यन्त्रबाट भयो : ओली

काठमाडौं । नेकपा (एमाले)का अध्यक्ष केपी शर्मा ओलीले वर्तमान राजनीतिक अवस्थाप्रति तीव्र असन्तुष्टि जनाउँदै मुलुकमा अहिले परिभाषाविहीन, दिशाविहीन, नीतिविहीन र थितिविहीन राजनीति भइरहेको बताएका छन्।

आइतबार पार्टीका सांसदहरूलाई प्रशिक्षण दिँदै अध्यक्ष ओलीले लोकतान्त्रिक व्यवस्थामा सरकार परिवर्तनका लागि संविधान, कानुन र संसदीय प्रक्रिया स्पष्ट रूपमा व्यवस्था गरिएको भए पनि अहिलेको सरकारको सुरुआत नै हिंसा र षड्यन्त्रको पृष्ठभूमिबाट भएको आरोप लगाए।

उनले लोकतन्त्रमा हिंसा, आगजनी, तोडफोड, कब्जा तथा असंवैधानिक गतिविधिबाट सत्ता परिवर्तन स्वीकार्य नहुने उल्लेख गर्दै अहिलेको सरकारले त्यही प्रवृत्तिबाट आफ्नो यात्रा सुरु गरेको दाबी गरे।

‘अहिलेको राजनीति परिभाषाविहीन, दिशाविहीन, नीतिविहीन र थितिविहीन बनेको छ। लोकतन्त्रमा सरकार परिवर्तनका लागि संवैधानिक, कानुनी र संसदीय बाटाहरू हुन्छन्। हिंसा, आगजनी, तोडफोड, कब्जा र असंवैधानिक गतिविधिबाट सरकार परिवर्तन गरिँदैन। अहिले बनेको सरकारको प्रारम्भ नै मान्छे मार्ने, मराउने र षड्यन्त्र गराउनेबाट भएको हो,’ ओलीले भने।

प्रशिक्षणका क्रममा उनले लोकप्रियताको नाममा ‘पपुलिज्म’ को भद्दा अभ्यास भइरहेको टिप्पणी गर्दै त्यसले राजनीति मात्र होइन, समाजमा समेत विकृति बढाएको बताए।

‘यहाँ प्रश्न लोकप्रियताको मात्र होइन। लोकप्रिय देखिन पपुलिस्ट शैली अपनाउनेभन्दा पनि त्योभन्दा अगाडि बढेर पपुलिज्मको भद्दा अभ्यास भइरहेको छ,’ उनले भने।

अध्यक्ष ओलीले सामाजिक सञ्जालको प्रयोगप्रति पनि चिन्ता व्यक्त गरे। सामाजिक सञ्जाल स्वस्थ बहस र विचार आदानप्रदानको माध्यम बन्न सक्ने भए पनि दर्ता, उत्तरदायित्व र जवाफदेहिताको अभावमा त्यसको दुरुपयोग भइरहेको उनको भनाइ थियो।

उनका अनुसार सामाजिक सञ्जालमार्फत निराधार र असत्य सूचना फैलाएर समाजमा भ्रम सिर्जना गर्ने तथा विकृति बढाउने प्रवृत्ति बढ्दै गएको छ।

‘सामाजिक सञ्जालले असामाजिक ढंगले काम गर्ने र समाजमा भयानक विकृति फैलाउने अवस्था देखिएको छ। स्वस्थ बहस हुन सक्छ, तर कोही दर्ता हुन नपर्ने, उत्तरदायी नहुने, जवाफदेहिता लिन नपर्ने र निराधार तथा असत्य कुरा प्रचार गरेर भ्रम फैलाउने काम भइरहेको छ,’ ओलीले बताए।