कांग्रेस नेता शकंर भण्डारीको आह्वान : हिन्दूराज्य पूनःस्थापनाको लागि ढिलाई नगरौं (विज्ञप्तीसहित)

काठमाडौं, २३ असोज । सनातन हिन्दूराष्ट्र नेपाल स्थापना महाभियानका संयोजक शंकर भण्डारीले मुलुक अहिले इतिहासकै सबैभन्दा कमजोर र संवेदनशील अवस्थामा पुगेको बताएका छन्।

भण्डारीका अनुसार, युवा पुस्ताले लोकतान्त्रिक मूल्य र मान्यता सुदृढ गर्न सुरु गरेको भ्रष्टाचारविरुद्धको प्रदर्शनलाई केही मुलुकविरोधी तत्वले आफ्नो स्वार्थका लागि अपहरण गरेर देशमा अराजकता फैलाउने प्रयास गरेका छन्।

उनले भने, “भदौ २३ गते निर्दोष युवामाथि सरकारले गरेको दमनले जनआक्रोश बढायो, तर भदौ २४ गते जेनजीको शान्तिपूर्ण आन्दोलनको आवरणमा अराष्ट्रिय तत्वले देशमा विध्वंस मच्चाए। यसले लोकतान्त्रिक मूल्य र राष्ट्रिय एकता दुवैलाई क्षति पुर्‍यायो।”

भण्डारीले अहिलेको परिस्थितिमा सबै राष्ट्रवादी शक्तिहरू एकजुट हुनुपर्ने आवश्यकता औंल्याए। उनका अनुसार, कांग्रेस, एमाले र माओवादीले दलगत स्वार्थभन्दा माथि उठेर राष्ट्रिय स्वार्थलाई प्राथमिकता दिनुपर्छ।

उनले भने, “अब दलगत राजनीति होइन, राष्ट्रिय एकता जरुरी छ। तीनै ठूला दलले परिस्थिति बुझेर मुलुकलाई संकटबाट जोगाउने प्रण लिनुपर्छ।”

भण्डारीले नेपालको पहिचान सनातन हिन्दू राज्यको रूपमा रहेको र त्यसलाई पुनःस्थापना गर्नु अहिलेको प्रमुख आवश्यकता भएको पनि बताए।

उनका अनुसार, २०४७ सालको संविधानले नेपाललाई सनातन हिन्दू राज्यको रूप दिएको थियो, जुन नेपालको मौलिकता र सांस्कृतिक पहिचान हो। उनले भने, “हिन्दू राज्य पुनःस्थापनामा अब ढिलाइ गर्नु हुँदैन। संविधानको मूल प्रावधानलाई यथावत राख्दै आवश्यक संशोधन गरेर राष्ट्रिय एकताको जग बलियो बनाउने बेला आएको छ।”

भण्डारीले सबै राजनीतिक दल, राष्ट्रवादी संगठन र नागरिकहरूलाई “राष्ट्र, धर्म र संस्कृति बचाउन एकसाथ जुट्न” आह्वान गरे। उनका अनुसार, देशको सार्वभौमसत्ता, धार्मिक स्वतन्त्रता र सामाजिक सद्भाव कायम राख्न सबैले आफ्नो भूमिका निभाउनुपर्छ।