विश्वकपमा मेसीको किर्तिमानः मिरोस्लाभ क्लोजको किर्तिमानीसँग बराबरी

काठमाडौं । साबिक विजेता अर्जेन्टिनाले फिफा विश्वकप–२०२६ मा विजयी सुरुआत गरेको छ। कप्तान लियोनल मेस्सीको शानदार ह्याट्रिकको मद्दतमा अर्जेन्टिनाले अल्जेरियालाई ३–० गोलअन्तरले पराजित गरेको हो।

अमेरिकाको कान्सास सिटी रंगशालामा सम्पन्न खेलमा मेस्सीले १६औँ, ५८औँ र ७६औँ मिनेटमा गोल गर्दै अर्जेन्टिनालाई सहज जित दिलाए। खेलभरि अर्जेन्टिनाले बलमाथि नियन्त्रण कायम राख्दै आक्रामक प्रदर्शन गरेको थियो भने अल्जेरियाले मेस्सीको लय रोक्न सकेन।

सन् २००६ देखि लगातार विश्वकप खेल्दै आएका ३९ वर्षीय मेस्सीको यो विश्वकप करियरकै पहिलो ह्याट्रिक हो। यसअघि उनले विश्वकपका विभिन्न संस्करणमा महत्वपूर्ण गोल गरे पनि एकै खेलमा तीन गोल गर्न सफल भएका थिएनन्।

ह्याट्रिकसँगै मेस्सीको विश्वकपमा कुल गोल संख्या १६ पुगेको छ। यस उपलब्धिसँगै उनले विश्वकप इतिहासका सर्वाधिक गोलकर्ताहरूको सूचीमा आफ्नो स्थान अझ मजबुत बनाएका छन्।

गत संस्करणमा अर्जेन्टिनालाई विश्वकप उपाधि दिलाएका मेस्सीले नयाँ संस्करणमा पनि उत्कृष्ट लय कायम राखेका छन्। पहिलो खेलमै ह्याट्रिक गरेपछि उपाधि रक्षाको अभियानमा अर्जेन्टिना बलियो दाबेदारका रूपमा देखिएको छ।

समूह चरणको अर्को खेलमा अर्जेन्टिनाले अस्ट्रियासँग प्रतिस्पर्धा गर्नेछ भने अल्जेरियाले पहिलो हारपछि पुनरागमनको लक्ष्यसहित जोर्डनविरुद्ध मैदान उत्रिनेछ। मेस्सीको उत्कृष्ट प्रदर्शनले अर्जेन्टिनी समर्थकहरूलाई पुनः विश्वकप सफलताको आशा जगाएको छ।