ग्लोबल आइएमई बैंकले कमायो ६ अर्ब २० करोड नाफा

काठमाडौं । ग्लोबल आइएमई बैंक लिमिटेडले आर्थिक वर्ष २०८१/८२ को चौथो त्रैमाससम्म ६ अर्ब २० करोड रुपैयाँ खुद नाफा आर्जन गरेको छ, जुन अघिल्लो वर्षको सोही अवधिको तुलनामा १.१० प्रतिशतले बढी हो। गत वर्ष यस अवधिसम्म बैंकले ६ अर्ब १३ करोड रुपैयाँ नाफा कमाएको थियो।

नाफामा वृद्धिसँगै बैंकको वितरणयोग्य मुनाफा ५ अर्ब ३७ करोड रुपैयाँ पुगेको छ भने वितरणयोग्य प्रतिशेयर आम्दानी १४ रुपैयाँ ११ पैसा रहेको छ।

समीक्षा अवधिमा खुद ब्याज आम्दानी ०.८५ प्रतिशतले घटेपनि, खुद फि तथा कमिशन आम्दानी २०.१२ प्रतिशतले र कुल सञ्चालन आम्दानी ३.०१ प्रतिशतले बढेको छ। तर, इम्पेरमेन्ट चार्ज ३ अर्ब ६१ करोडबाट बढेर ४ अर्ब ३० करोड पुगेपछि सञ्चालन मुनाफा २.७५ प्रतिशतले घटेको हो।

बैंकको प्रतिशेयर आम्दानी (EPS) १८ पैसा बढेर १६ रुपैयाँ २८ पैसा पुगेको छ। असार मसान्तसम्म प्रतिशेयर नेटवर्थ १७७ रुपैयाँ ६३ पैसा र मूल्य-आम्दानी अनुपात (P/E ratio) १५.९५ गुणा रहेको छ।

३८ अर्ब ११ करोड रुपैयाँ चुक्ता पूँजी रहेको बैंकको जगेडा कोषमा २९ अर्ब ५८ करोड रुपैयाँ सञ्चित छ। यस अवधिसम्म बैंकले ५ खर्ब ५० अर्ब रुपैयाँ निक्षेप संकलन गर्दै ४ खर्ब ११ अर्ब रुपैयाँ कर्जा प्रवाह गरेको छ।