सेतो खबर
काठमाडौं । सञ्चार, सूचना तथा प्रविधिमन्त्री एवं सरकारका प्रवक्ता पृथ्वीसुब्बा गुरुङले अध्यागमन विभागमा देखिएको अनियमितता प्रकरणमा गृहमन्त्री रमेश लेखेलाई राजीनामा दिनुपर्ने माग उचित नभएको बताएका छन्।
आइतबार राजधानीको भद्रकालीस्थित नेपाल पर्यटन बोर्ड परिसरमा आयोजित एक फोटो प्रदर्शनी कार्यक्रममा सहभागी हुन पुगेका मन्त्री गुरुङले सञ्चारकर्मीहरूसँग कुरा गर्दै उक्त टिप्पणी गरेका हुन्।
उनले घटनाको सम्बन्धमा सुरुमा विस्तृत छानबिन आवश्यक रहेको उल्लेख गर्दै यसप्रकारको माग अनावश्यक हतार भएको बताए। “सुरुमा छानबिन हुन दिनुपर्छ। अध्यागमनमा जे खालको अनियमितता भयो भनेर छानबिन भइरहेको छ। छानबिनको निष्कर्ष नआउँदै राजीनामाको माग गर्नु उपयुक्त हुँदैन,” गुरुङले स्पष्ट पारे।
हालै अध्यागमन विभागमा कार्यरत एक कर्मचारी तीर्थ भट्टराई पक्राउ परेपछि गृहमन्त्री लेखेलाई नै जिम्मेवार ठहर गर्दै विभिन्न पक्षबाट उनको राजीनामाको माग भइरहेका छन्। सोही सन्दर्भमा पत्रकारले प्रश्न गर्दा मन्त्री गुरुङले प्रतिप्रश्न गर्दै भने, “एउटा तीर्थ भट्टराई पक्राउ पर्छ, गृहमन्त्रीले राजीनामा दिनुपर्ने भन्ने हुन्छ र?”
उनले घटनाको गम्भीर छानबिन हुनु आवश्यक रहेको भन्दै निष्पक्ष अनुसन्धानपछि मात्र जिम्मेवारी तोकिनुपर्ने धारणा राखे।
मन्त्री गुरुङले देशको समृद्धिका लागि अब भाषण र नाराबाट होइन, कर्मबाट परिणाम निकाल्ने बेला आएको बताएका छन्। “हामीले कम बोल्ने र धेरै काम गर्ने संस्कृतिको थालनी गर्नुपर्छ,” उनले भने।
उनका अनुसार, सरकारले गरिने कामको मूल्यांकन भाषणले होइन, आम नागरिकको जीवनस्तरमा पारेको प्रभावले गरिनुपर्छ।
कार्यक्रममा उनले नेपालजस्तो देशका लागि पर्यटन क्षेत्र अत्यन्त सम्भावनायुक्त रहेको उल्लेख गरे। “थोरै लगानीमा धेरै उपलब्धि हासिल गर्न सकिने क्षेत्र पर्यटन हो,” मन्त्री गुरुङले भने, “यसको प्रभावकारी प्रवर्द्धन गर्न सके समृद्धिको मूल स्रोत बनाउन सकिन्छ।”
उनले सरकार, निजी क्षेत्र तथा सरोकारवाला निकायहरू बीच सहकार्यको खाँचो औंल्याउँदै इमानदार भएर पर्यटन प्रवर्द्धनमा लाग्न सबैलाई आग्रह गरे।
काठमाडौँ । राष्ट्रिय गौरवको आयोजना मानिएको भैरहवास्थित गौतम बुद्ध अन्तर्राष्ट्रिय विमानस्थलमा भएको अनियमितता र भ्रष्टाचारबारे छानबिन गर्न प्रतिनिधिसभाको... विस्तृतमा
