प्रयोगशालासहितको क्वारेन्टाइनका लागि सत्ती मुल भन्सार कार्यालयमा तालाबन्दी

यज्ञराज उपाध्याय, टीकापुर । टीकापुर उद्योग वाणिज्य संघले सत्ती मुल भन्सार कार्यालयमा मंगलबार तालाबन्दी गरेको छ । भन्सारमा प्रयोगशालासहितको क्वारेन्टाइनको माग राख्दै संघले तालाबन्दी गरेको हो ।

यहि २८ गते मुल भन्सारमा क्वारेन्टाइनको व्यवस्थाका लागि ईलाका प्रशासन कार्यालय टीकापुरलाई संघले ज्ञापनपत्र बुझाएको थियो । पहिलो चरणको आन्दोलनका रुपमा भन्सार कार्यालयमा एक घण्टा तालाबन्दी र एक घण्टा कार्यालय घेराउ गरिएको संघ सदस्य बम बहादुर ओलीले जानकारी दिनुभयो ।

२०७५ असार २० गतेको नेपाल सरकारको निर्णयले छोटी भन्सारबाट मुल भन्सारमा स्तरोन्नति पाएको यस भन्सारमा अहिलेसम्म हुनुपर्ने विकासको कामहरु नभएकाले उद्योग वाणिज्य संघ र व्यापारीहरुले बारम्बार आवाज उठाइरहेका छन् । मुल भन्सार सरहको सुविधा नहुँदा टीकापुर क्षेत्रमा आउने फलफुल, तरकारी लगायत खाद्यान्न धनगढी वा नेपालगन्ज ल्याउनुपर्ने बाध्यात्मक स्थितिले व्यापारी मर्कामा रहेको सदस्य ओलीले बताए । उनले मुल भन्सार भएको पाँच वर्षसम्म पनि सरकारले टीकापुरलाई हेपाहा प्रवृत्ति देखाएको दाबी गरे । “मुल भन्सार सरहको व्यवस्था नहुँदा यस क्षेत्रमा आउने फलफुल, तरकारी, खाद्यान्न धनगढी वा नेपालगन्ज हुँदै ल्याउनुपर्ने भएकाले व्यापारीहरु निकै मर्कामा छन्,” सदस्य ओलीले भने, “सरकारले टीकापुरलाई हेपाहा प्रवृत्ति देखाएको छ, अब हामी चुप लाग्ने छैनौं ।”

यस्तै भारतीय कस्टमले भन्सार गरेता पनि यस भन्सारले सिस्टमबाटै भन्सार हटाएकाले कच्चा पदार्थ भन्सारमै थन्किएको उनले बताए । अब चरणबद्ध रुपमा आन्दोलन गर्दै जाने बताउदै उनले अहिले संघले प्रयोगशालासहितको क्वारेन्टाइन स्थापनालाई प्राथमिकतामा राखेको जानकारी दिए ।

चार जना सांसद र एक संघीय मन्त्री पाएको यस क्षेत्रको विकासमा उनीहरुको त्यति सक्रियता नदेखिएकाले टीकापुरको विकास सुस्त गतिमा रहेको व्यवसायीहरु बताउछन् । काम नगर्ने हो भने सांसद, मन्त्री भएको अर्थ नहुने भन्दै पदबाट राजिनामा दिएर घरमै बस्न आग्रह गर्दै व्यापारीले आक्रोश पोख्ने गरेका छन् ।