निर्वाचनको कडा प्रतिवाद गर्ने विप्लव माओवादीको चेतावनी

बुटवलः नेत्रविक्रम चन्द विप्लव नेतृत्वको नेपाल कम्युनिष्ट पार्टीले जर्वजस्त रुपमा स्थानीय तहको निर्वाचन गरिए त्यसको कडा प्रतिवाद गर्ने चेतावनी दिएको छ। रोल्पाको थवाङमा हालै सकिएको महाअधिवेशनबाट स्थानीय तहको निर्वाचन खारेज गर्ने निर्णय गरेको चन्द नेतृत्वको पार्टीले निर्वाचन भइहाले प्रतिवाद गर्ने चेतावनी दिएको हो।

निर्वाचन जनताको पक्षमा नभएको दाबी गर्दै पार्टीका प्रवक्तासमेत रहेका स्थायी समिति सदस्य खड्कबहादुर विकले त्यस्तो निर्वाचन खारेज गर्न माग गरे। ‘जनताको पक्षमा नभएको निर्वाचन, जनताकै सहयोग र समर्थनमा प्रतिकार हुन्छ,’ उनले भने । क्रान्तिकारी पत्रकार संगठनले सोमबार बुटवलमा गरेको पत्रकार सम्मेलनमा उनले स्थानीय निर्वाचनले देशमा प्रतिक्रान्ति ल्याउने जिकिर गरे। जनता र देशको हितमा स्थानीय निर्वाचन छ भनेर राजनीतकरुपले प्रमाणित गरेर देखाउन कांगे्रस, एमाले र माओवादी केन्द्रलाई उनले चेतावनी दिए।

स्थानीय निर्वाचनले देशमा द्वन्द्व निम्ताउने जिकिर गर्दै विकले अहिले निर्वाचन गर्नु तीन दलको मुर्खता भएको दावी गर्दै उनले कांगे्रस, एमाले र माओवादी केन्द्रको आलोचना गरे। उनले राज्य सञ्चालकहरुले राष्ट्रघात गरेको दावी गर्दै देश र जनताको मुक्तिका लागि वैज्ञानिक समाजवादी व्यवस्था स्थापना गर्नुको विकल्प नभएको बताए ।

राज्य सञ्चालकहरुका कारण राष्ट्रियता संकटमा परेको उल्लेख गर्दै दलाल पूंजीपतिको हातमा रहेको सत्ता जनताको पक्षमा ल्याउनु पर्ने उनले बताए। उनले जनताको राजनीतिक र सांस्कृतिक अधिकारका लागि स्थानीय तहदेखि केन्द्रीय तहसम्म जनसत्ता स्थापना गरिने बताए।