कुटपिट गर्नेबिरुद्ध अशोक दर्जीले दिए प्रहरीमा जाहेरी

काठमाडौं । चर्चित गायक अशोक दर्जीले आफूमाथि कुटपिट भएको भन्दै झापा प्रहरीमा जाहेरी दिएका छन्। घटनाको भिडियो सामाजिक सञ्जालमा भाइरल भएपछि प्रहरीले औपचारिक अनुसन्धान अघि बढाएको जनाएको छ।

जिल्ला प्रहरी कार्यालय झापाका अनुसार दर्जीले गत असार २२ गते इलाका प्रहरी कार्यालय बिर्तामोडमा उजुरी दर्ता गराएका थिए। जाहेरीमा अंकित प्रधान र शनिश्चरेका ‘शुक्रे’ भनेर चिनिने एक व्यक्तिले आफूलाई कुटपिट गरेको, ‘चोर–चोर’ भन्दै सार्वजनिक रूपमा अपमानित गरेको तथा घटनाको भिडियो सामाजिक सञ्जालमा राखेर चरित्रहत्या गरेको उल्लेख गरिएको छ।

जिल्ला प्रहरी कार्यालय झापाका प्रवक्ता डीएसपी रञ्जन अवाका अनुसार उजुरीमा उल्लेखित घटनाको अनुसन्धान सुरु गरिएको छ। उनका अनुसार घटना उजुरी दर्ता हुनुभन्दा करिब एक महिना अघि भएको थियो।

दर्जीले दिएको निवेदनअनुसार उनी मामाघर गएका बेला बिर्तामोडको महानन्द चोकस्थित एक खाजा पसलमा खाजा खाने क्रममा एक हजार रुपैयाँ हराएको विषयलाई लिएर विवाद सुरु भएको थियो। सोही घटनापछि केही दिनपछि बिर्तामोडस्थित देवीबस्ती गेट नजिक स्कुटरमा पेट्रोल भरिरहेका बेला आफूलाई बाटोमै रोक्दै कुटपिट गरिएको उनले दाबी गरेका छन्।

उनले कुटपिट गर्ने व्यक्तिहरूले आफूलाई ‘चोर’ भन्दै गालीगलौज गरेको, घटनाको भिडियो खिचेर सामाजिक सञ्जालमा सार्वजनिक गरेको र भिडियो हटाइदिन अनुरोध गर्दा उल्टै धम्की दिँदै आएको पनि जाहेरीमा उल्लेख गरेका छन्।

आइतबार साँझ उक्त घटनासँग सम्बन्धित भिडियो टिकटकलगायत सामाजिक सञ्जालमा तीव्र रूपमा फैलिएको थियो। भाइरल भिडियोमा एक युवकले अशोक दर्जीको गालामा थप्पड हानेको दृश्य देखिन्छ। भिडियो सार्वजनिक भएसँगै घटनाप्रति सामाजिक सञ्जालमा व्यापक चासो र प्रतिक्रिया देखिएको छ।

प्रहरीले घटनामा संलग्न भनिएका व्यक्तिहरूको खोजी तथा बयान लिने प्रक्रिया अघि बढाएको जनाएको छ। डीएसपी अवाका अनुसार आरोपितमध्ये अंकित प्रधान प्रहरीको सम्पर्कमा आइसकेका छन् भने ‘शुक्रे’ भनिने व्यक्ति भारततर्फ गएको प्रारम्भिक जानकारी प्राप्त भएको छ।

**”पीडित र आरोपित दुवै पक्षलाई छलफलका लागि बोलाइएको छ। दुवैको बयान र प्रमाणका आधारमा घटनाको वास्तविकता पत्ता लगाएर कानुनबमोजिम प्रक्रिया अघि बढाइनेछ,”** डीएसपी अवाले बताएका छन्।

प्रहरीले घटनासम्बन्धी भिडियो, प्रत्यक्षदर्शीको बयान तथा अन्य प्रमाण संकलन गरी अनुसन्धानलाई अगाडि बढाइरहेको जनाएको छ। अनुसन्धानपछि घटनाको वास्तविकता पुष्टि भएअनुसार आवश्यक कानुनी कारबाही गरिने प्रहरीको भनाइ छ।