जेन–जी रेड फोर्सकी संयोजक स्मृति तिमल्सिना पक्राउ

काठमाडौं ।  नेकपा निकट युवा संगठन जेन–जी रेड फोर्सकी संयोजक स्मृति तिमल्सिनालाई प्रहरीले नियन्त्रणमा लिएर सोधपुछपछि रिहा गरेको घटनाले यतिबेला राजनीतिक तथा सामाजिक वृत्तमा चर्चा पाएको छ।

मंगलबार बिहान करिब ११ बजे काठमाडौंको अनामनगर क्षेत्रबाट सादा पोसाकमा आएका प्रहरीले उनलाई नियन्त्रणमा लिएका थिए। प्रारम्भिक जानकारीअनुसार “पार्टीका मान्छे हौँ, काम छ” भन्दै उनलाई नियन्त्रणमा लिइएको थियो। त्यसपछि उनलाई भद्रकालीस्थित जिल्ला प्रहरी परिसरमा लगेर सोधपुछ गरिएको थियो।

तिमल्सिनाले आफूलाई सरकारको आलोचना गरेको भिडियो सामग्रीका कारण पक्राउ गरिएको दाबी गरेकी छन्। उनका अनुसार प्रहरी कार्यालयमा उनलाई आगामी दिनमा सरकारविरुद्ध कुनै पनि भिडियो नबनाउन चेतावनी दिँदै लिखित कागज गराइएको थियो। साथै, भिडियो निर्माण गर्नुअघि सम्बन्धित निकायको अनुमति लिनुपर्ने भनिएको पनि उनले उल्लेख गरेकी छन्।

प्रहरीले भने यस घटनाबारे औपचारिक धारणा सार्वजनिक गरिसकेको छैन। यद्यपि स्रोतहरूका अनुसार सोधपुछपछि कागज गराएर उनलाई रिहा गरिएको हो।

स्मृति तिमल्सिना नेकपा सम्बद्ध जेन–जी रेड फोर्सकी संयोजक हुन्। उनलाई पार्टीले केही महिनाअघि उक्त जिम्मेवारी दिएको थियो। उक्त संगठनले देशभर युवामाझ सञ्जाल विस्तार गर्दै विभिन्न जनचेतनामूलक कार्यक्रम सञ्चालन गर्दै आएको बताइन्छ।

यस घटनापछि सामाजिक सञ्जाल तथा राजनीतिक वृत्तमा अभिव्यक्ति स्वतन्त्रताको विषयमा बहस सुरु भएको छ। कतिपयले सरकारको कदमलाई अभिव्यक्ति स्वतन्त्रता कुण्ठित गर्ने प्रयासको रूपमा आलोचना गरेका छन् भने केहीले सामाजिक सञ्जालको दुरुपयोग नियन्त्रणका लागि आवश्यक कदम भएको टिप्पणी गरेका छन्।

नयाँ सरकार गठन भएको छोटो समयमै यस्तो घटना सार्वजनिक भएपछि राज्यको भूमिका, अभिव्यक्ति स्वतन्त्रताको सीमा र सामाजिक सञ्जाल नियमनबारे थप बहस हुने संकेत देखिएको छ।