रौतहटका शिवालयहरुमा महाशिवरात्रिको उल्लास

रौतहट । आराध्यदेव भगवान शिवको विशेष उपासना गरिने महाशिवरात्रि पर्व आज देशैभर अत्यन्तै श्रद्धा र हर्षोल्लासका साथ मनाइँदैछ । यसैबिच, रौतहट जिल्लाका प्रमुख शिवालयहरूमा पनि एकाबिहानैदेखि भक्तजनहरूको ठूलो भिड लागेको छ ।

श्रद्धालुहरूले भगवान शिवलाई प्रिय लाग्ने बेलपत्र, धतुरोको फूल, गाईको दूध र जल अर्पण गरी पूजाआराधना गरिरहेका छन् । जिल्लाका विभिन्न मन्दिरहरूमा पुग्ने दर्शनार्थीहरूमा पुरुषको तुलनामा महिला भक्तजनहरूको सहभागिता उल्लेखनीय रूपमा देखिएको छ । विवाहित महिलाहरूले श्रीमानको दीर्घायु र अविवाहित युवतीहरूले सुयोग्य वरको कामना गर्दै व्रत बसी पूजापाठ गर्ने परम्पराका कारण मन्दिरहरूमा महिलाहरूको लामो लाम देखिएको हो ।

रौतहटको ऐतिहासिक तथा धार्मिक महत्त्व बोकेका शिवनगर, चन्द्रनिगाहपुर, महादेवपटी, पिपरा, सरुअठा, मौलापुर, नुनथर र सदरमुकाम गौर स्थित शिवमन्दिरहरूमा बिहान पाँच बजेदेखि नै जलाभिषेक गर्नेहरूको घुइँचो लागेको छ । विशेषगरी चन्द्रपुर नगरपालिकाको पर्यटकीय क्षेत्र नुनथरस्थित बागमती नदी किनारको मन्दिर र शिवनगरको महादेव मन्दिरमा भिड छ ।

गरुडा नगरपालिका स्थित शिवनगर मन्दिरमा महाशिवरात्रिको अवसरमा एक विशिष्ट परम्परा देख्न सकिन्छ । स्थानीय करण मिश्रका अनुसार, यहाँ भक्तजनहरूले काँधमा भन्टाको भार बोकेर चढाउने गर्छन् । शरीरमा आउने मुसा र विभिन्न छाला सम्बन्धी रोगहरू निको हुने जनविश्वासका साथ यहाँ भन्टा चढाउने गरिन्छ ।

त्यस्तै, मनोकाङ्क्षा पूरा भएको खुसीयालीमा वा भाकल पूरा गर्नका लागि परालले बाँधेको धानको मटका (मौर) चढाउने भक्तजनको संख्या पनि उतिकै छ । यो मौलिक परम्परा अवलोकन गर्न र पूजा गर्न रौतहट मात्र नभई छिमेकी जिल्ला सर्लाही, बारा र सीमावर्ती भारतीय सहरहरूबाट समेत हजारौँ श्रद्धालुहरू शिवनगर आइपुगेका छन् ।

महाशिवरात्रिकै अवसरमा ब्रह्मकुमारी राजयोग सेवा केन्द्रले विश्वशान्ति र राष्ट्रिय सद्भावको कामना गर्दै प्रभातफेरी तथा पदयात्राको आयोजना गरेको छ । जिल्लाका विभिन्न स्थानमा भजन–कीर्तन, दीप प्रज्वलन, र प्रसाद (हलुवा, फलफूल) वितरण भइरहेको छ । धेरै ठाउँमा आजको दिनलाई ’शिवजीको विवाह’ को रूपमा मनाउँदै राति शिवलिङ्गको विशेष श्रृङ्गार र पूजा गरिने कार्यक्रम छ ।

भक्तजनको अत्यधिक चापलाई मध्यनजर गर्दै जिल्ला प्रहरी कार्यालय रौतहट र ट्राफिक प्रहरीले सुरक्षा व्यवस्था कडा पारेको छ । शिवनगर र नुनथर जस्ता स्थानमा सवारी साधन व्यवस्थापन र सुरक्षाका लागि ठूलो संख्यामा सुरक्षाकर्मी परिचालन गरिएको छ । शिवनगर मन्दिर परिसरमा आजैदेखि मेला समेत लागेको छ ।