गृहमन्त्री अर्याल भन्छन्– म गृहमन्त्री भइसकेपछि देशमा थप हत्या, हिंसा र आगजनी हुन दिइनँ

काठमाडौं । गृहमन्त्री ओमप्रकाश अर्यालले अन्तरिम सरकारले केही पनि नगरेको भन्ने भाष्यप्रति कडा आपत्ति जनाएका छन्। बिहीबार काठमाडौंमा आयोजित एक कार्यक्रमलाई सम्बोधन गर्दै उनले परिवर्तनलाई स्वीकार नगरेसम्म द्वन्द्व नदोहोरिने स्पष्ट पारे।

गृहमन्त्री अर्यालले द्वन्द्व पुनः नहोस् भन्ने सुनिश्चितता अन्तरिम सरकारले गरेको जिकिर गर्दै आफू गृहमन्त्री बनेपछि देशमा हिंसा, आगजनी र राजनीतिक प्रकृतिका हत्या नभएको दाबी गरे। सरकार निष्क्रिय रहेको भन्ने आरोप निराधार भएको उनको भनाइ थियो।

उनले भने, ‘कतिपय कुरा परिवर्तनलाई स्वीकार गर्नुपर्छ। परिवर्तन स्वीकार गरे मात्रै द्वन्द्व दोहोरिँदैन। यो सुनिश्चितता यही सरकारले गरेको छ। हिंसा भएन, आगजनी रोकियो, मान्छे मर्न छोड्यो। यसलाई “केही पनि भएन” भन्नु गलत भाष्य हो।’

गृहमन्त्री अर्यालले विधिको शासन मिचेर गरिएका कामलाई सुशासन भन्न नसकिने स्पष्ट पार्दै कानुनबमोजिम कारबाही हुनुपर्नेमा जोड दिए। उनले कानुनभन्दा माथि कोही पनि नरहने सिद्धान्तमा सरकार प्रतिबद्ध रहेको बताए।

त्यसैगरी, उनले जेनजी पुस्ताका मुद्दा तथा एजेन्डा अन्तरिम सरकारको मुख्य रोडम्याप भएको उल्लेख गर्दै युवाको आवाज र अपेक्षालाई नीतिगत रूपमा सम्बोधन गरिने प्रतिबद्धता व्यक्त गरे।