सेतो खबर
काठमाडौँ । सहकारीको बचत रकम अपचलन सम्बन्धमा संसदीय छानबिन विशेष समितिको प्रतिवेदन संसद्ले सरकारलाई पठाएको छ। सोमवार प्रतिनिधिसभामा पेश भएको प्रतिवेदन आवश्यक कार्यार्थ सरकारलाई पठाइएको हो।
बैठकमा समिति सभापति सूर्यबहादुर थापा क्षेत्रीबाट प्रतिवेदन बुझेपछि सभामुख देवराज घिमिरेले सरकारलाई पठाउन सचिवालयलाई निर्देशन दिएका हुन्।
उनले भने, ‘सभामा प्रस्तुत सहकारी संस्था बचत रकम दुरुपयोग सम्बन्धमा संसदीय छानबिन विशेष समितिको प्रतिवेदन २०८१ आवश्यक कार्यार्थ नेपाल सरकारलाई पठाउन म सचिवालयलाई निर्देश गर्दछु।’
विभिन्न सहकारीहरूको बचत रकम अपचलन भएको भन्दै छानबिन गर्न प्रतिनिधिसभाले थापाको संयोजकत्वमा गत जेठ १५ गते ७ सदस्यीय छानबिन विशेष समिति गठन गरेको थियो। उक्त समितिले ६६ वटा बैठक गरेको र विभिन्न ४५१ जना व्यक्तिहरूसँग सुझावमूलक जानकारी र अन्तरक्रिया गरेको थियो।
प्रतिवेदन पेश गर्दै संयोजक थापाले सहकारी ठगीको आरोपित ४७ जना सहकारी सञ्चालक, गोर्खा मिडिया नेटवर्क प्रालिका सञ्चालक तथा कर्मचारीसमेत ३ जना र नियामक निकायका ५ जना गरी जम्मा ५५ जनासँग सोधपुछ गरिएको जानकारी सदनलाई गराएका थिए।
समितिले गोर्खा मिडियाका तत्कालीन प्रबन्ध निर्देशक रबि लामिछानेसहित चार जनालाई प्रचलित कानुनबमोजिम कारबाही गर्न सिफारिस गरेको छ ।
समितिले सूर्यदर्शन सहकारीसहितका ५ वटा सहकारीको ६५ करोड रुपैयाँ गोर्खा मिडियामा अपचलन भएको निष्कर्ष निकालेको छ ।
लामिछानेले गोर्खा मिडियाकै नाममा जारी भएको चेकमा हस्ताक्षर गरेर तलब एवं कार्यालय सञ्चालनका लागि पैसा निकासा गराएको पाइएको छ ।
२१ वटा चेकमध्ये एउटामा अध्यक्ष जीबी राईबाहेक अन्य सबैमा लामिछानेकै हस्ताक्षर गरेको समितिले भेट्टाएको छ। ८३ अर्ब अवैध कारोबारमध्ये ८५ करोड गोर्खा मिडिया नेटवर्कमा गएको तथ्य समितिले फेला पारेको छ ।
गोर्खा मिडियाले १० करोड मात्रै आम्दानी गरेपनि बाँकी रकम सहकारीबाटै आएको समितिको प्रतिवेदनमा उल्लेख छ ।
हेर्नुहोस् संसदीय समितिको प्रतिवेदनका केही अंश:
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
