काठमाडौंमा चिनीको अभाव, व्यापार संघले दिने चिनीमा नाफा नदेखेपछी लिनै मान्दैनन् व्यापारी

यज्ञराज उपाध्याय, काठमाडौं, २ कार्तिक । काठमाडौं उपत्यकामा चिनीको हाहाकारै देखिएको छ । एक महिना अगाडी देखि नै अभाव रहेको चिनी चाडपर्व नजिकिदै गएपछि खुद्रा पसलदेखि सरकारको सहुलियत पसल सबैतिर अभाव भएको हो ।

नेपालीहरुको महान् चाड बडा दशैं दैलोमै आइपुग्दा यो वर्ष देशभरी चिनीको अभाव देखिएको छ । अघिल्ला वर्षमा प्रायः कहिल्यै यसरी हाहाकार नभएकोमा यो वर्ष कतै पनि चिनी नपाइने अवस्था आएपछि उपभोक्ता मर्कामा परेका छन् । चिनीकै लागि उपत्यकाका पसलहरुमा लामै लाइन लाग्ने गरेको छ । कतिपय त सहुलियतमा चिनी पाउने आशामा धादिङदेखि काठमाडौं आउने तर चिनी नपाइने भएकाले रित्तै फर्किने गरेका छन् ।

सरकारले एक हजार मेट्रिक टन चिनी ल्याएर अभाव हुन नदिने बताए पनि उपभोक्ताले त्यो व्यवहारतः लागू नभएको बताउन थालेका छन् । सरकारले सुरु गरेको सहुलियत पसलहरुमा पनि एक दिनमै चिनी सकिएको थियो ।

यता खुद्रा व्यापारी संघले एभरेस्ट सुगर मिलबाट चिनी संकलन गरेर काठमाडौं महानगरपालिकाका ३२ वटै वडामा रहेका खुद्रा पसलहरुमा चिनी उपलब्ध गराइरहेको जनाए पनि हाहाकार जताततै उत्तिकै छ । संघका कोषाध्यक्ष ध्रुव अधिकारीका अनुसार मिलबाट एक सय ११ दशमलव ८५ रुपैयाँ खरिद गरिएको चिनी व्यापारीसम्म पुर्याउदा ढुवानी लगायत जोडेर एक सय १५ रुपैयाँ मा बेच्ने निर्णय भएको छ ।

व्यापारीले एक सय १५ रुपैयाँमा बेच्नुपर्ने भएकाले एक रुपैयाँका लागि प्रायः व्यापारीले चिनी लिनै नमानेको उनले बताए । उनले जताततै चिनी वितरण गरिरहे पनि पसलसम्म पुर्याउदा ५० केजी तौल रहने चिनीको बोरामा २ केजीसम्म कम देखिने र नाफा नहुने भएपछी व्यापारीले चिनी लिनै नमानेको बताए ।

‘हामीले बल्खुस्थित एभरेस्ट सुगर मिलबाट चिनी कलेक्ट गरेर महानगरका ३२ वटै वडाका खुद्रा पसलमा पुर्याउने काम सुरु गरेका छौं । १ सय ११ दशमलव ८५ मा हामीले चिनी उठाउँछौं, ढुवानी लगायत जोडेर १ सय १५ मा बेच्ने भनेका छौं,’ अधिकारीले भनें, ‘खुद्रा व्यापारीसम्म चिनी पुर्याउदा ५० केजीको बोराबाट एक दुई केजी चिनी कम भइहाल्ने भएपछी खासै नाफा नहुने भन्दै व्यापारीले लिन नमानेको अवस्था छ, तैपनि हामी महानगर भरी चिनी वितरणको प्रयासमै छौं, कतिपय व्यापारीले आफै आएर पनि लिइराख्नु भएको छ ।’

उनले एक व्यापारीलाई ५ बोरासम्म चिनी दिइराखेको जानकारी समेत दिए । कममा २ केजीदेखि चिनी लिन सकिने उनको दाबी छ ।