बाल सुधार गृहबाट भागेकामध्ये १४ जना पक्राउ पर्न बाँकी, एसएसपी भन्छन्,“कसैलाई केही खतरा छैन”

यज्ञराज उपाध्याय, काठमाडौं, ५ भाद्र । भक्तपुरको सानोठिमीस्थित बाल सुधार गृहबाट सोमबार ढोका, झ्याल टोडेर भागेका नाबालक कैदीबन्दीमध्ये अब १४ जना पर्न बाँकी रहेको काठमाडौं उपत्यका प्रहरी कार्यालय रानीपोखरीले जनाएको छ ।

रामेछापको मन्थली नगरपालिका-३ स्थायी घर भएका कमल बस्नेतको बाल सुधार गृहभित्रै आइतबार राती रहस्यमय मृत्यु भएको भन्दै आफन्तले सुधार गृह अगाडी नाराबाजी र तोडफोड गरेको मौका छोपेर सुरक्षाकर्मीलाई नै आक्रमण गरि नाबालक कैदीबन्दी भागेका थिए । त्यसपछी आक्रामक बनेको प्रहरीले दुई एसएसपीको कमाण्डमा फरार कैदीबन्दीको खोजी सुरु गरेको थियो ।

जिल्ला प्रहरी परिसर भक्तपुर काठमाडौं उपत्यका प्रहरी कार्यालय रानीपोखरीअन्तर्गत पर्ने भएकाले त्यहाँबाट प्रहरी वरिष्ठ उपरीक्षक एसएसपी दिनेश राज मैनालीको कमाण्डमा एक टोलि सुधार गृहतर्फ गएर अनुसन्धान र फरार कैदीबन्दीको खोजीमा लागेको थियो ।

उपत्यका प्रहरी कार्यालयका प्रवक्तासमेत रहेका मैनालीले उनीहरुको खोजीका लागि बाक्लो संख्यामा प्रहरी परिचालन गरेको र अहिलेसम्म दुई सय जनासम्म पक्राउ गरिसकेको सेतो खबरलाई जानकारी दिए । उनले दुई सय २१ जना भागेकोमा अब १४ जना पक्राउ पर्न बाँकी रहेको जानकारी दिदै उनीहरुको परिवारलाईसमेत जानकारी दिएर सम्पर्कमा आए खबर गर्न बताइएको, तिनै जिल्लाबाट प्रहरी परिचालन गरिएको र अन्यत्र प्रहरी कार्यालयमासमेत खबर गरिएकाले छिट्टै पक्राउ पर्ने बताए ।

विभिन्न मुद्दामा अदालतबाट फैसला वा पुर्पक्ष हुँदा नाबालक भएता पनि अहिले साबालक भइसकेकाले सुरक्षाकर्मीमाथि आक्रमण गरेर भागेको एसएसपी मैनालीले बताए । उनका अनुसार महिला, पुरुष गरि दुई ब्लकमा रहेका कैदीबन्दीमध्ये महिला ब्लकबाट कोहि पनि भागेनन् र पुरुष ब्लकबाट पनि ३३ जना भागेका थिएनन् ।

उनीहरुबाट कसैलाई केही खतरा छैन, प्रहरी सुरक्षाका लागि रातदिन खटिएको छन्ः मैनाली

एसएसपी मैनालीले सुधार गृहबाट नाबालक पक्राउ परेर साबालक भइसकेकाहरुले आफ्नै कोठामा समेत तोडफोड गरेर भागेको जानकारी दिदै भागेका मध्ये धेरैलाई पक्राउ गरिसकेको र अब थोरै मात्र बाँकी रहेकाले उनीहरुबाट उपत्यकाबासी सर्वसाधारण लगायत कसैलाई कुनै पनि खतरा नभएको बताएका छन् ।

प्रहरीले पलपलमा सुरक्षा एनालाइसिस गरेको बताउदै त्यसका लागि प्रहरी रातदिन खटिएको बताए । नागरिकको जीउधनको सुरक्षा गर्नु प्रहरीको कर्तव्य भएकाले सुरक्षाका लागि २४ घन्टै प्रहरी खटिएको एसएसपी मैनालीले बताए । “बाल सुधार गृहमा रहेका अहिलेका साबालकले आफ्नै कोठामा तोडफोड गरेर भागेका रहेछन्, उनीहरुमध्ये धेरै जना त पक्राउ परिसके अब १४ जनासम्म पक्राउ पर्न बाँकी छन्, उनीहरु पनि छिट्टै पक्राउ पर्छन्”, एसएसपी मैनाली भने, “थोरै मात्र फरार छन्, उनीहरुबाट कसैलाई केही खतरा छैन, प्रहरीले पलपलमा सुरक्षा एनालाइसिस गरिरहने भएकाले त्यसैका लागि सक्रिय भइरहन्छौ ।”