रौतहट २ र ३ मा काङ्ग्रेसकै दाबी, माओवादी हाबी

काठमाडौं, भाद्र ३१ । रौतहटमा गठबन्धनको तर्फबाट २ वटा क्षेत्रको सिट बाँडफाँडमा कुरा मिलेपनि बाँकी २ क्षेत्रमा कुरा मिल्न सकेको छैन । संघीय संसद प्रतिनिधि सभाका प्रत्यक्ष तर्फ क्षेत्र नम्बर १ नेकपा (एकीकृत समाजवादी) को भागमा परेको छ भने क्षेत्र नम्बर ४ नेपाली काङ्ग्रेसको । क्षेत्र नम्बर १ नेपालको क्षेत्रसमेत भएकाले पनि उक्त समाजवादीको लागि छाड्न अन्य दल सहमत देखिन्छन् ।

मतको अंकगणित र २०७४ को चुनावको अवस्थाका आधारमा सिट बाँडफाँड गर्नुपर्ने नेपाली काङ्ग्रेस रौतहट जिल्ला सभापति जितेन्द्र यादवले बताएका छन् । सेतो खबरसँग कुरा गर्दै उनले रौतहटको क्षेत्र नम्बर १ बाहेक बाँकी तिनैवटा क्षेत्रमा काङ्ग्रेसको पकड राम्रो भएकाले केन्द्रले त्यही अनुसार सिट बाँडफाँड गर्नुपर्ने बताए ।

उनी आफू क्षेत्र नम्बर ३ को उम्मेदवार बन्न चाहेकाले पनि त्यसलाई समेत गुमाउन नचाहने मनस्थितिमा देखिन्छन् । २०७४ को चुनावमा नेकपा (माओवादी केन्द्र) बाट प्रभु शाहले उनलाई पराजित गरेकाले उक्त क्षेत्रमा माओवादीले पनि दाबी गरिरहेकै छ । यस क्षेत्रमा समाजवादीको पनि दाबी देखीन्छ । प्रभु शाह नेकपा (एमाले) मा प्रवेश गरेकाले अब काङ्ग्रेस नै बलियो रहेको जिल्ला सभापति यादवले दाबीसमेत गरेका छन् । “रौतहटको हकमा क्षेत्र नम्बर १ बाहेक तिनवटै क्षेत्रमा हामी बलियो छौं,” उनले भने, “क्षेत्र नम्बर ३ को पहिलाको उम्मेदवार भएकाले यो पटक पनि उम्मेदवारको आकांक्षी हुँ । केन्द्रले त्यही अनुसार निर्णय गर्नुपर्छ ।”

नेपाली काङ्ग्रेस रौतहटका एक युवा नेताका अनुसार क्षेत्र नम्बर ३ मा माओवादीबाट चुनाव जितेर एमाले गएका प्रभु शाहका मान्छेहरुले दाबी गरिरहेका छन् । क्षेत्र नम्बर २ मा अघिल्लो चुनाव पनि काङ्ग्रेसले जितेपनि माओवादी र जसपाले दाबी गरिरहेकै छन् । क्षेत्र नम्बर ३ मा जिल्ला सभापतिसमेत आकांक्षी देखिएकाले २ भन्दा विवाद अलि बढी देखिएको छ । उनले यसलाई विवादभन्दा पनि सिट तानातानको काम भइरहेको समेत बताएका छन् ।

सिट बाँडफाँडका लागि विभिन्न दलका नेताहरुको प्रतिनिधित्व हुने गरि बनाइएको कार्यदलका एक नेताका अनुसार अहिलेलाई प्रत्यक्षतर्फको सिट बाँडफाँडको काम रोकिएको छ । अब समानुपातिकको बन्दसूची तयार भएपछि फेरि सिट बाँडफाँटबारे सहमति खोजिने छ ।