नेपाल–भारत सीमाना पर्ने नेपाली भुमीमा तारबार लगाउँदा भारतीय एसएसबीको अवरोध

चैत्र १६,बर्दिया राजापुर स्थित नेपाल–भारत सीमा छुटयउने अन्तर्राष्ट्रिय सीमानामा पर्ने दशगजाबाट करिब ८० मिटर उत्तर नेपाली भुमीमा तारबार लगाउन एसएसबीले अवरोध प्रयास गरेको छ । स्थानीयको प्रतिवादपछि एसएसबीको अवरोध तोड्दै नेपाली भुभागमा तारबार लगाउने काम भइरहेको छ । जिल्लाको राजापुर नपा र गेरुवा गाउँपालिकाको सीमावर्ती क्षेत्रमा भारतीय जंगलबाट आउने हात्ती लगायत जंगली जनावर रोक्न विद्युतिय तारबार लगाउने क्रममा एसएसबी नेपाल भित्र छिरेर रोक्ने प्रयास गरेको थियो ।

सीमा स्तम्भ नम्बर ८६ र ८७ बीच नेपाल भुमीमा विद्युतिय तारबार लगाउने क्रममा एसएसबीले स्थानीयलाई धम्काउँदै रोक्ने प्रयास गरेका थिए । तारबार रोक्न एसएसबी हतियारसहित नेपाली भुमी प्रवेश गरेको स्थानीयको भनाइ छ । एसएसबीले तारबार लगाए ज्यान मार्ने धम्की दिएको स्थानीय विष्णु रिजालले बताए । घटना लगतै राजापुरस्थित सीमा सुरक्षा सशस्त्र प्रहरी बल पुगेको थियो । सशस्त्र प्रहरी बल राजापुरका सशस्त्र प्रहरी निरीक्षक प्रकाश रानाले संयुक्त नापी टोली नआएसम्म दशगजादेखि करिव सय मिटर उत्तर नेपाली भुभागमा तारबार लगाउन सहमति भएको जनाए ।

प्रनि राना एसएसबी हतियारसहित नेपाल प्रवेश नगरेको दाबी गरेकाछन् । नेपाली भुभाग भित्र तारबार लगाउन नपाउने भारतीय सुरक्षाकर्मीको हेपाहा प्रवृत्तिले स्थानीय आतंकित भएको भिम्मापुरका लालबहादुर चौधरीले बताए । निर्वाचन क्षेत्र पूर्वधार कार्यक्रम अन्तर्गत सीमावर्ती खैरीचन्दनपुरबाट राजापुरसम्म करिब २७ किमी क्षेत्रमा भारतबाट प्रवेश गर्ने जंगली जनावरबाट हुने क्षती कम गर्न तारबार लगाउने काम भइरहेको छ ।  इ – कान्तिपुर बाट