सेतो खबर
काठमाडौं । श्रीमतीलाई बचाउनका लागि आफ्नै मिर्गौला दिन तयार भएका राजकुमार डंगोल कठिन परिस्थितिबाट गुज्रिरहेका थिए । आफ्नी श्रीमती विष्णु कुमारीको उपचारका लागि उनी काठमाडौं केएमसी अस्पतामा धाइरहेको थिए ।
जीवनसाथीलाई बचाउन आफ्नै शरीरको अंगसमेत दिन तयार भएका राजकुमार उपचार खर्च जुटाउन संघर्ष गरिरहेका थिए । राजकुमारले श्रीमतीलाई बचाउन आफ्नो ज्यानको समेत परवाह नगरी यस्तो निर्णय गरेका थिए ।
श्रीमतीको उपचारका लागि उनले विभिन्न व्यक्तिसँग सहयोग माग्दै रकम जुटाएका थिए । लामो प्रयासपछि उपचारका लागि केही रकम जम्मा गर्न सफल भए पनि प्राकृतिक विपत्तिले उनको आशामाथि ठूलो चोट पुर्यायो ।
बाढीका कारण उनले जुटाएको रकमसमेत गुमाउनुपरेपछि राजकुमारमाथि अर्को ठूलो संकट आइपरेको थियो ।
श्रीमतीलाई बचाउने सपना बोकेर अस्पताल धाइरहेका राजकुमारले उपचारका लागि आवश्यक रकम जुटाउन पुनः सकिने होकि होइन भन्ने अन्योलमा थिए ।
एकातिर बाढीले पैसा बगाएर लैजाँदा श्रीमतीको जीवन बचाउने जिम्मेवारी, अर्कोतर्फ विनाशकारी बाढीले ठुलो धनजनको क्षतिसँगै मानिसको ज्यानै लगेको थियो ।
बेत्रावती बजारमा आएको विनाशकारी बाढीले घरबार मात्रै बगाएन बिरामी श्रीमतीको जीवन बचाउन उपचारका लागि जम्मा गरेर राखेको रकम समेत बगाएको उनले सुनाए ।
प्रत्यारोपणका लागि ऋणसापटी, पसलको आम्दानी, सुनचाँदी तथा परिवारका सदस्यले जम्मा गरेको रकमसहित करिब २५–३० लाख रुपैयाँ बराबरको नगद तथा सम्पत्ति जुटाएको बताए । श्रीमतीको उपचारका लागि छुट्याइएको रकममध्ये करिब १५ लाख रुपैयाँ नगदसमेत घरमै राखिएको उनले बताए ।
बाढीपछि जन्मथलो बगर बनाएको देखेका डंगोलले एकातिर आफ्नो गाउँ गुमाएको पीडा खेपे भने अर्कोतिर श्रीमतीको उपचार कसरी गर्ने भन्ने चिन्ता पिरलेको बताए ।
राजकुमारले भने, ‘एकातिर बाढीको पीडा थियो, अर्कोतिर श्रीमती पहिल्यै बिरामी थिइन् । श्रीमती कसरी बचाउने भन्ने मात्रै दिमागमा आयो ।’
त्रिशूली नदी आफ्नो ठाउँभन्दा निकै तल रहेकाले त्यति ठूलो बाढी बजारसम्म आइपुग्ला भन्ने कल्पना समेत नगरेको उनले बताए ।
करिब दुईदेखि सवा दुई घण्टामा त्रिशूली पुगेका डंगोल ढुङ्गेको प्रहरी चौकीबाट तल झर्दा त्रिशूलीको पानी त्यहाँसम्म आइपुगेको देखेर स्तब्ध भए । ढुङ्गे बजारसमेत लगभग देखिन छाडेको थियो ।
त्यतिबेला उनको मनमा पहिलोपटक ठूलो डर पस्यो-श्रीमतीको प्रत्यारोपणका लागि जम्मा गरेको पैसा पनि बाढीले बगायो कि भन्ने ।
‘दुःखसुख गरेर राखेको पैसा बाढीले लग्यो कि भन्ने डर लाग्यो । पैसा सबै बग्यो भने बूढीको ट्रान्सप्लान्ट गर्न पनि सक्दिनँ भन्ने भयो,’ उनले भने ।
जे सोचेको त्यही भयो, उपचार गर्नको लागि जुटाएको पैसा सबै बग्यो । त्यसपछि श्रीमती बचाउने चिन्ता थपियो ।
यसै सन्दर्भमा पत्रकार रविन घलेले उनको पीडा सुनेर सामाजिक सञ्जालमा भिडियो सार्वजनिक गरिदिए । परिवारलाई त्यसबेला सामाजिक सञ्जालमार्फत सहयोग जुट्ने अपेक्षासमेत थिएन । तर भिडियो सार्वजनिक भएपछि सहयोगका लागि विभिन्न क्षेत्रबाट पहल सुरु भएको उनले जानकारी दिए ।
भिडियो सार्वजनिक भएपछि चिकित्सक डा. सुनिल शर्माले उनको श्रीमतीको मिर्गौला प्रत्यारोपण निःशुल्क गरिदिने प्रतिबद्धता जनाएको बताए ।
यसबाट निराश बनेका परिवारमा फेरि आशा पलाएको बताए । उनका अनुसार प्रत्यारोपणका लागि आवश्यक ठूलो खर्च चिकित्सकको सहयोगबाट जोगिएको छ ।
श्रीमतीको उपचारका लागि सहयोग जुटाउने क्रममा विभिन्न व्यक्तिबाट आर्थिक सहयोगसमेत प्राप्त भएको उनले बताए । अहिलेसम्म करिब पाँचसात लाख रुपैयाँ सहयोग संकलन भएको र श्रीमतीको उपचारका लागि आवश्यक रकम पुगेको उनको भनाइ छ ।
श्रीमतीको उपचारका लागि सहयोग जुटेपछि उनले आफ्नो गाउँका अन्य बाढीपीडितलाई सहयोग गर्न सबैसँग आग्रह गरे । उनका अनुसार बाढीका कारण बेत्रावती क्षेत्रमा धेरै परिवारले आफन्त, घर, सम्पत्ति र जीविकोपार्जनका आधार गुमाएका छन् ।
उनले भने, ‘मेरो भन्दा पनि मेरो गाउँमा पीडामा परेका दाजुभाइलाई सहयोग गरिदिनुहोस् ।’ बाढीपीडितको समस्या तत्कालको राहतले मात्र समाधान नहुने उनले बताए ।
बाढीले आफ्नो घर र सम्पत्तिसँगै श्रीमतीको उपचारका लागि वर्षौँदेखि जुटाएको आर्थिक आधारसमेत बगाए पनि चिकित्सक, पत्रकार, गाउँका दाजुभाइ तथा विभिन्न व्यक्तिको सहयोगले अहिले परिवारमा फेरि आशा पलाएको उनले सुनाए ।
‘मलाई अहिले धेरै सहयोग आवश्यक छैन, मेरो उपचार र प्रत्यारोपणका लागि सहयोग प्राप्त भएको छ । गाउँमा भने धेरै परिवार घरबारविहीन र आफन्तविहीन भएका छन्,’ उनले भने ।
आफू भने श्रीमतीको प्रत्यारोपणको तयारीका कारण गाउँ फर्कनसमेत नसकेको उनले बताए । चिकित्सकले संक्रमणबाट जोगिन विशेष सावधानी अपनाउन र रुघाखोकी वा ज्वरो आए प्रत्यारोपण प्रभावित हुनसक्ने उनले बताए ।
उनले आफ्नो जीवनको कठिन घडीमा सहयोग गर्ने पत्रकार रविन घले, डा. सुनिल शर्मा, डा. सुरेश महर्जन, डा. विजयमान सिंह कटवाल, गाउँका दाजुभाइ तथा सहयोग गर्ने सबैप्रति धन्यवाद व्यक्त गरे।
आफ्नो परिवारको संकटमा सहयोग पाएको अनुभव सुनाउँदै उनले अब आफूभन्दा बढी पीडामा रहेका गाउँलेलाई सहयोग गर्न सबैलाई अपिल गरे । ‘मरे पनि सँगै मरौँला, बाँचे पनि सँगै बाँचौँला’ भन्ने भावनाका साथ उनी हाल श्रीमतीको उपचारमा जुटिरहेका छन् ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
