बानेश्वरमा प्रहरीमाथि हातपात गर्ने व्यक्ति पक्राउ गर्न सफल तीन प्रहरी पुरस्कृत

काठमाडौं । काठमाडौंको बानेश्वरमा ड्युटीका क्रममा उत्कृष्ट कार्यसम्पादन गर्ने तीन प्रहरी कर्मचारीलाई नगद पुरस्कारसहित पुरस्कृत गरिएको छ।

गत भदौ ९ गते बिहान करिब ९ः३० बजे काठमाडौं महानगरपालिका–१० स्थित बानेश्वरबाट थापागाउँ जाने सडकखण्डमा आकाशे पुलमुनि प्रहरी कर्मचारीहरू ड्युटीमा खटिएका थिए। सो क्रममा उनीहरूले सर्वसाधारणलाई आकाशे पुल प्रयोग गरी सुरक्षित रूपमा बाटो काट्न आग्रह गर्दै सम्झाइबुझाइ गरिरहेका थिए।

प्रहरीका अनुसार सोही क्रममा एक व्यक्तिले प्रहरीको आग्रह अटेर गर्दै ड्युटीमा खटिएका प्रहरी कर्मचारीमाथि गालीगलौज तथा हातपात गरेका थिए। घटनापछि प्रहरीले उनलाई नियन्त्रणमा लिएर कानुनी प्रक्रियामा ल्याएको थियो।

प्रहरीले नियन्त्रणमा लिएका व्यक्ति जिल्ला जुम्ला तातोपानी गाउँपालिका–२ घर भई काठमाडौं महानगरपालिका–३१ मा बस्दै आएका २७ वर्षीय राज कठायत रहेको जनाएको छ।

ड्युटीका क्रममा उत्पन्न परिस्थितिलाई संयमित रूपमा व्यवस्थापन गर्दै कठायतलाई नियन्त्रणमा लिएर कानुनी दायरामा ल्याउन सफल भएको भन्दै प्रहरी संगठनले सम्बन्धित कर्मचारीहरूको कार्यसम्पादनको प्रशंसा गरेको छ।

उत्कृष्ट कार्य गर्ने प्रहरी कर्मचारीहरूमा प्रहरी सहायक हवल्दार भरत कुमार राना, प्रहरी सहायक हवल्दार मधु कुमार यादव र प्रहरी जवान अबिना स्याबा परियार रहेका छन्।

उनीहरूलाई प्रहरी पेशाप्रति निष्ठावान, इमानदार तथा अनुशासित रही जिम्मेवारी निर्वाह गरेको भन्दै नगद पुरस्कार प्रदान गरिएको हो।

काठमाडौं उपत्यका प्रहरी कार्यालयका प्रमुख प्रहरी अतिरिक्त महानिरीक्षक सुशील सिंह राठौरको प्रमुख आतिथ्यतामा आयोजित कार्यक्रममा उनीहरूलाई पुरस्कार प्रदान गरिएको प्रहरीले जनाएको छ।

प्रहरी संगठनका अनुसार उत्कृष्ट कार्य गर्ने कर्मचारीलाई प्रोत्साहन र सम्मान गर्दा अन्य प्रहरी कर्मचारीको समेत मनोबल तथा हौसला बढ्नेछ। साथै, यसले प्रहरी कार्यसम्पादनमा सकारात्मक प्रभाव पार्नुका साथै संगठनले अंगिकार गरेको लक्ष्य हासिल गर्न सहयोग पुग्ने विश्वास लिइएको छ।

सार्वजनिक स्थानमा ट्राफिक नियम तथा सडक सुरक्षाका विषयमा सर्वसाधारणलाई सम्झाउने क्रममा प्रहरीमाथि नै दुर्व्यवहार भएको घटनामा प्रहरी कर्मचारीले जिम्मेवारीपूर्वक काम गरेको भन्दै उनीहरूको कार्यलाई संगठनले उदाहरणीय मानेको छ।