गणेश नेपाली मृत्यु प्रकरणमा सरकार–महानगर–परिवारबीच ९ बुँदे सहमति, स्वतन्त्र छानबिन समिति गठन हुने

काठमाडौं । त्रिपुरेश्वरस्थित राहदानी विभाग अगाडि आत्मदाह प्रयासपछि उपचारका क्रममा ज्यान गुमाएका मुगुका २५ वर्षीय गणेश नेपालीको मृत्यु प्रकरणमा सरकार, काठमाडौं महानगरपालिका र पीडित परिवारबीच ९ बुँदे सहमति भएको छ।

आइतबार जिल्ला प्रशासन कार्यालय काठमाडौंमा प्रमुख जिल्ला अधिकारी ईश्वरराज पौडेलको उपस्थितिमा भएको वार्तापछि सहमतिपत्रमा हस्ताक्षर गरिएको हो। सहमतिसँगै विगत तीन दिनदेखि त्रिभुवन विश्वविद्यालय शिक्षण अस्पताल, महाराजगञ्जमा रोकिएको गणेश नेपालीको शवको पोस्टमार्टम गरी परिवारलाई बुझाउने प्रक्रिया अघि बढ्ने भएको छ।

सहमतिअनुसार घटनाको सत्यतथ्य पत्ता लगाउन नेपाल सरकारले पूर्वन्यायाधीशको संयोजकत्वमा स्वतन्त्र छानबिन समिति तत्काल गठन गर्नेछ। उक्त समितिले गठन भएको सात दिनभित्र सरकारसमक्ष प्रतिवेदन पेश गर्नेछ।

यस्तै, छानबिन समितिको प्रतिवेदन, प्रचलित कानुन तथा विगतका अभ्यासका आधारमा गणेश नेपालीलाई सहिद घोषणा गर्ने प्रक्रिया अघि बढाइने सहमति भएको छ।

घटनाका दिन फिल्डमा खटिएका काठमाडौं महानगरपालिकाका नगर प्रहरी कर्मचारीहरूलाई छानबिन प्रतिवेदन सार्वजनिक नहुँदासम्म तत्कालका लागि निलम्बन गर्न जिल्ला प्रशासन कार्यालयले महानगरपालिकालाई पत्राचार गर्ने सहमति पनि भएको छ।

सहमतिअनुसार मृतककी श्रीमती एकमाया नेपालीलाई योग्यता र क्षमताका आधारमा काठमाडौं महानगरपालिकामा रोजगारीको व्यवस्था गरिनेछ। साथै, उनकी छोरीको उच्च शिक्षासम्मको सम्पूर्ण अध्ययन खर्च महानगरपालिकाले व्यहोर्नेछ। यसका लागि नेपाल सरकारका सम्बन्धित निकायले आवश्यक समन्वय गर्ने जनाइएको छ।

त्यस्तै, आश्रित परिवारलाई राहतस्वरूप यथोचित आर्थिक सहयोग उपलब्ध गराउने, काठमाडौंमा हुने काजकिरिया तथा अन्त्येष्टिको सम्पूर्ण खर्च महानगरपालिकाले व्यहोर्ने तथा मृतकका एकाघरका परिवारको स्वास्थ्य बिमाको व्यवस्था सम्बन्धित सरकारी निकायमार्फत मिलाइने सहमति पनि भएको छ।

सहमतिपत्रमा सरकारी पक्षबाट प्रमुख जिल्ला अधिकारी ईश्वरराज पौडेल र काठमाडौं महानगरपालिकाका प्रमुख प्रशासकीय अधिकृत सरोज गुरागाईंले हस्ताक्षर गरेका छन्। पीडित पक्षबाट मृतककी श्रीमती एकमाया नेपाली, बुवा चिने नेपाली, आमा सौरी नेपाली, दाजु मदन नेपाली, बहिनी सुन्दरी नेपाली तथा वार्ता टोलीका सदस्यहरूले हस्ताक्षर गरेका छन्।

मुगुको सोरु गाउँपालिका–१ जवलधाराका स्थायी बासिन्दा गणेश नेपाली काठमाडौंमा राइड–सेयरिङ चालकका रूपमा कार्यरत थिए। असार २५ गते राहदानी विभाग परिसरमा पार्किङ र ‘ह्वील लक’ विवादपछि उनले शरीरमा पेट्रोल छर्केर आत्मदाह प्रयास गरेका थिए। गम्भीर घाइते भएका उनको भोलिपल्ट असार २६ गते वीर अस्पतालको बर्न युनिटमा उपचारका क्रममा निधन भएको थियो।