सेतो खबर
धरान । धरान उपमहानगरपालिकाका निवर्तमान प्रमुख तथा श्रम संस्कृति पार्टीका अध्यक्ष हर्कराज राई (हर्क साम्पाङ) विरुद्ध उजुरी दर्ता गरिएको छ।
सुनसरी–१ बाट प्रतिनिधिसभा सदस्यका उम्मेदवारसमेत रहेका साम्पाङविरुद्ध धरान नगर बाल सञ्जालले आइतबार निर्वाचन अधिकृतको कार्यालय र प्रहरीमा उजुरी दर्ता गराएको हो।
आगामी फागुन २१ गते हुने निर्वाचनको चुनावी प्रचार–प्रसारका क्रममा बालबालिकाको प्रत्यक्ष प्रयोग गरिएको आरोप उजुरीमा लगाइएको छ।
उजुरीमा बालबालिका ऐन, २०७५ को परिच्छेद २, दफा ७ को उपदफा अनुसार बालबालिकालाई प्रत्यक्ष वा अप्रत्यक्ष रूपमा राजनीतिक उद्देश्यका लागि प्रयोग गर्न नपाइने कानुनी व्यवस्था रहेको स्मरण गराइएको छ।
नगर बाल सञ्जालले साम्पाङलाई निर्वाचन अधिकृतको कार्यालयमा उपस्थित गराई आवश्यक छलफल र छानबिन गरी आचारसंहिता तथा कानुनबमोजिम कारबाही गर्न माग गरेको छ।
उजुरी बुझ्दै प्रमुख निर्वाचन अधिकृत दिव्यराज घिमिरे ले घटनाको छानबिन गरी प्रमाणित भएमा एक लाख रुपैयाँसम्म जरिवाना हुनसक्ने तथा उम्मेदवारी दर्ता खारेजसमेत हुनसक्ने जानकारी दिनुभयो।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
