विश्वकप खेल्ने नेपाली राष्ट्रिय टोलीको आधिकारिक जर्सी सार्वजनिक

काठमाडौँ । सन् २०२६ मा आयोजना हुने आईसीसी टी–२० विश्वकप क्रिकेट प्रतियोगितामा सहभागिता जनाउने नेपाली राष्ट्रिय क्रिकेट टोलीको आधिकारिक जर्सी सार्वजनिक गरिएको छ।

नेपाल क्रिकेट संघ (क्यान) ले सोमबार आयोजित एक विशेष कार्यक्रमबीच विश्वकपको ट्रफीसँगै नेपाली टोलीको नयाँ जर्सी सार्वजनिक गरेको हो। कार्यक्रममा क्यानका पदाधिकारी, खेलकुदकर्मी तथा क्रिकेट समर्थकहरूको उपस्थिति रहेको थियो।

सार्वजनिक गरिएको जर्सी गाढा निलो रंगको रहेको छ। जर्सीको अगाडिको भागमा नेपालको राष्ट्रिय पहिचान झल्किने चन्द्र र सूर्य अंकित गरिएको छ, जुन राष्ट्रिय झण्डाबाट प्रेरित डिजाइन हो। क्यानका अनुसार जर्सीको डिजाइनले राष्ट्रिय गौरव, नेपालीपन र अन्तर्राष्ट्रिय मञ्चमा नेपालको पहिचानलाई प्रतिबिम्बित गर्ने उद्देश्य बोकेको छ।

क्यानले नेपाली क्रिकेट समर्थकहरूलाई लक्षित गर्दै जर्सीको मूल्य पनि सुलभ बनाएको जनाएको छ। समर्थकहरूका लागि यो जर्सी ७९९ रुपैयाँमा उपलब्ध हुनेछ। यसले धेरैभन्दा धेरै समर्थकलाई नेपाली टोलीसँग भावनात्मक रूपमा जोड्ने क्यानको अपेक्षा छ।

जर्सी तथा विश्वकप ट्रफी सार्वजनिक कार्यक्रममा बोल्दै नेपाल क्रिकेट संघ (क्यान) का अध्यक्ष चतुरबहादुर चन्दले नेपालमा क्रिकेटप्रतिको लोकप्रियता तीव्र गतिमा बढ्दै गएको बताए। उनले नेपाली टोलीको अन्तर्राष्ट्रिय प्रदर्शनले क्रिकेटप्रति आम जनताको आकर्षण बढाएको उल्लेख गरे।

अध्यक्ष चन्दले विश्वकप ट्रफीलाई नेपालका विभिन्न विश्व सम्पदा सूचीमा सूचीकृत तथा प्रमुख पर्यटकीय क्षेत्रहरूमा लैजाने ‘ट्रफी टुर’ कार्यक्रमसमेत सञ्चालन गरिने जानकारी दिए। उनका अनुसार यस अभियानमार्फत क्रिकेटको प्रवर्द्धनसँगै पर्यटन प्रवर्द्धनमा पनि टेवा पुग्ने विश्वास क्यानले लिएको छ।

क्यानका पदाधिकारीहरूका अनुसार आगामी विश्वकपलाई लक्षित गर्दै नेपाली टोलीको तयारी, पूर्वाधार विकास र समर्थकसँगको सम्बन्ध अझ बलियो बनाउने योजनामा संघ केन्द्रित छ। नयाँ जर्सी सार्वजनिकसँगै नेपाली क्रिकेटप्रेमीहरूमा विश्वकपप्रतिको उत्साह झनै बढेको देखिन्छ।