फागुन २१ पछि सुशिला कार्कीलगायत सरकारमा बसेकाहरु देश छाडेर भाग्नुपर्ने दिन आउँछः प्रभु साह

काठमाडौं, ९ पुस । आम जनता पार्टी (आजपा) का अध्यक्ष एवं पूर्वमन्त्री प्रभु साहले बयान लिनुपर्ने जेन–जी हत्यारा र भ्रष्टाचारीलाई सरकारले संरक्षण गर्दै रातो कार्पेट ओछ्याएर चाकडी गरिरहेको आरोप लगाएका छन्। आजपाको केन्द्रीय कमिटी बैठकलाई सम्बोधन गर्दै उनले प्रधानमन्त्री सुशिला कार्कीले जेन–जी हत्यारा र भ्रष्टाचारीसँग बसेर ‘चिया संवाद’ थालेको भन्दै कडा आलोचना गरे।

अध्यक्ष साहका अनुसार अन्तरिम सरकार जेन–जी हत्याराहरूको सेवामा समर्पित बनेको छ। “बयान लिनुपर्नेहरूलाई कारबाही गर्नुको सट्टा रातो कार्पेट ओछ्याएर चाकडी गरिँदैछ,” उनले भने, “जेन–जी आन्दोलन दमनकारी ओली सरकार र अपहरणकारी सुशीला सरकारले युवाहरूको रगतको अवमूल्यन गर्‍यो। आज दुवै चिया चर्चामा व्यस्त छन्।”

ओलीको अहंकारका कारण मुलुक खरानी भएको दाबी गर्दै साहले अझै पनि धम्की र दम्भ नरोकिएको बताए। सचेत नेपाली जनताले यस अवस्थालाई नजिकबाट नियालिरहेको र आगामी निर्वाचनमार्फत जवाफ दिने तयारीमा रहेको उनको भनाइ छ।

साथै, उनले सुशीला सरकारले चुनाव नगराउने खेलमा लागेको आशंका व्यक्त गरे। “यदि चुनाव नगर्ने सोच बनाइएको हो भने २१ फागुनपछि सरकारमा बसेकाहरूले देश छोडेर भाग्नुपर्ने दिन आउनेछ,” उनले चेतावनी दिए।

संसद् पुनःस्थापनाको नाटक बन्द गर्न आग्रह गर्दै साहले चुनावबाहेक निकासको अर्को बाटो नभएको बताए। “तोकिएकै मितिमा निर्वाचन गर्नुको विकल्प छैन। सरकार आफैं चुनावी वातावरण बनाउन असफल भइसकेको छ। नसक्ने हो भने हात उठाउन म अनुरोध गर्दछु,” उनले भने।

अध्यक्ष साहले वर्तमान सरकारले मुलुकलाई ढुंगे युगतर्फ धकेलेको टिप्पणीसमेत गरे। “सबै देशसँगको सम्बन्ध टुटाउँदै राजदूतहरू फिर्ता गरेर त्यसको सुरुवात गरियो,” उनले आरोप लगाए।