पूर्वाधारलाई गुणस्तर बनाउन आवश्यक छ : मन्त्री भण्डारी

काठमाडौं । उद्योग वाणिज्य तथा आपूर्तीमन्त्री दामोदर भण्डारीले पूर्वाधारलाई गुणस्तर बनाउन आवश्यक रहेको बताएका छन् ।

सोमबार काठमाडौंमा आयोजित नेपाल सिमेन्ट उत्पादन संघले आयोजना गरेको कार्यक्रममा बोल्दै उनले नेपाल सरकारको पुँजीगत तर्फबाट सबैभन्दा बढि बजेटको माग र खर्च गर्ने क्षेत्र सडक पूर्वाधार भएतापनि अगाडि बनाउँदै जाने र पछाडि भत्कदै जाने समस्या रहेको बताए ।

उनले भने,‘अहिले हामी सिमेन्टमा आत्मानिर्भर छौं । स्रोत, साधन थोरै आयात गर्नुपर्ने र धेरै आन्तरिक स्रोतबाट यसलाई विकासको नयाँ गति दिन सकिन्छ ।  सरकारको पुँजीगत तर्फबाट सबैभन्दा बढि बजेटको माग भएको र खर्च गर्ने क्षेत्र सडक पूर्वाधार भएको छ । तर भइराखेको के छ भने अगाडि बनाउँदै जाने र पछाडि भत्किदै जाने समस्या छ । गुणस्तर भएन, पूर्वाधारलाई गुणस्तर बनाउन आवश्यक छ । सुरक्षित यात्रा गर्नको लागि पनि व्यवस्थित सडक सञ्जाल, पूर्वाधार जरुरी छ ।’

त्यस्तै उनले  आफ्नै बल र स्रोत साधनबाट अबको विकासलाई एउटा भरपर्दो विकास दिन सकिने धारणा राखे । आफ्नै देशको स्रोत साधनको अधिकतम प्रयोग हुनेगरी काम गर्नुपर्ने उनको भनाइ छ ।

उनले भने,‘हामीले आत्मानिर्भरता एवम आफ्नै बल र स्रोतका साधनबाट अबको विकासलाई एउटा भरपर्दो विकास दिन सक्छौं । वातावरणमैत्री विकास दिन सक्छौं र यो यात्रामा हामी सबै सँगै हिड्न सक्छौं । त्यसैले मन्त्रालय, निकाय र विभागहरुले आफैंले व्यवस्थित छलफ लगरेर निष्कर्ष निकाल्न जरुरी छ । जसका कारण विकासको यात्रा अगाडि बढ्छ । र अधिकतम स्रोत साधनको पनि प्रयोग पनि हुन्छ ।’

त्यस्तै सोही कार्यक्रममा बोल्दै भौतिक पूवाधार तथा यातायातमन्त्री देवेन्द्र दाहालले मानिसहरुमा सडक नै विकास हो भन्ने बुझाइ रहेको बताए । केही मानिसहरुले केही पनि भएको छैन भन्ने निराशामात्र बाडिरहेको भन्दै त्यसलाई चिर्न आवश्यक रहेको उनको भनाइ छ ।

उनले भने,‘मानिसहरुमा सडक नै विकास हो भन्ने बुझाइ छ । भौतिक प्रगतिको हिसाबले नेपाल अरु देश भन्दा पछाडि छैन् । केही मानिसहरुले केही पनि भएको छैन्, केही पनि हुँदैन् भनेर निराशामात्र बाँडिरहेको छन् । त्यसैले त्यसलाई चिर्न पर्नेछ ।’