राष्ट्रपतिमा एमालेको असहमति कांग्रेसका लागि प्रधानमन्त्री फकाउने ‘अस्त्र’

यज्ञराज उपाध्याय, काठमाडौं । यतिबेला नेपालको राजनीतिले कस्तो मोड लिन्छ अनुमानसम्म लगाउन नसकिने अवस्था बनेको छ, कारण हुन् प्रचण्ड—ओली । यी दुबै नेपाली राजनीतिका चतुर खेलाडी हुन् ।

प्रधानमन्त्रीमा समर्थन गर्ने तर पछि छिनमै सडकमा पुर्याउनसक्ने हैसियत राख्ने प्रचण्ड हुन् वा चुनाव भरी धारे हात हानेर सरकार निर्माणमा शानदार गठबन्धन ढाल्न त्यही धारे हात हानेकोलाई सत्तारोहण गराउने ओली । यी दुई एकअर्काका मित्रसंगै राजनीतिका कट्टर प्रतिस्पर्धी पनि हुन् ।

नेपाली कांग्रेसको प्रधानमन्त्री मोहलाई अस्त्र बनाएर एमाले अध्यक्ष केपी शर्मा ओलीले कांग्रेस नेतृत्वको गठबन्धन टुटाएर प्रचण्डलाई गत पुस १० गते प्रधानमन्त्रीका लागि समर्थन गरेका थिए । राष्ट्रपति र सभामुख एमालेको भागमा र आधा आधा कार्यकाल सरकारको नेतृत्व गर्ने सर्तसहित प्रधानमन्त्रीमा समर्थन गरेका उनले अहिले माओवादीले राष्ट्रपतिमा राष्ट्रिय सहमति खोजेपछि असहमति जनाउदै छन्, जसलाई कांग्रेसले प्रधानमन्त्री प्रचण्ड फकाउने अस्त्रका रुपमा लिएको छ ।

प्रचण्डलाई प्रधानमन्त्रीमा कांग्रेसले समेत विश्वासको मत दिएपछि उनी राष्ट्रिय सहमतिमा राष्ट्रपति चयन गर्नुपर्ने अडानमा छन् । दिनमै कहिले बालुवाटार त कहिले बालकोट गर्दै भेटवार्ता बाक्लिए पनि सहमति हुन नसकेपछी कांग्रेस हौसिएको सहजै बुझिन्छ । यहि फागुन २५ गते हुने राष्ट्रपति निर्वाचनका लागि फागुन १० भित्र सहमति गरेर १३ गते उम्मेदवारी दर्ता तोकिएकोमा अहिलेसम्म सत्तारुढ दलका शिर्ष नेताबीच सहमति हुन नसक्दा कांग्रेसले आफुले राष्ट्रपति पाए प्रचण्डलाई ५ वर्ष प्रधानमन्त्रीमा समर्थन गर्ने कार्ड आधिकारिक रुपमा फ्याकिसकेको छ ।

शुक्रबार सञ्चारकर्मीसंग कुरा गर्दै कांग्रेस प्रवक्ता एवं सांसद डा। प्रकाशशरण महतले भने, “को प्रधानमन्त्री? को निरन्तरता? भन्दा पनि माओवादीले राष्ट्रपतिमा कांग्रेसको उम्मेदवारलाई समर्थन गरेमा प्रधानमन्त्री जिलाई दिएको विश्वासको मतलाई कांग्रेसले निरन्तरता दिनुपर्छ ।”

माओवादी अध्यक्षसमेत रहेका प्रचण्ड र एमाले अध्यक्ष ओलीको दैनिक भेटवार्ता, छलफल अनिर्णित र दुबैको अडान कायमै भएपछि केही समय अघिदेखि कांग्रेसले पनि आफ्ना बैठक र छलफललाई तिब्रता दिएको छ । आजै मात्र कानुन व्यवसायीसहित कांग्रेस संसदीय कार्यसम्पादन समितिको बैठक बसेको थियो । खैर, बैठकमा के छलफल भयो अहिलेसम्म बाहिर आइसकेको छैन ।

प्रवक्ता महतको अभिव्यक्ति तरंगिएको अहिले अवस्थालाई प्रधानमन्त्री प्रचण्डले व्यर्थ भएजस्तो गरि वर्तमान गठबन्धनका दुई शिर्ष नेता एकै ठाउँमा रहेको बताएता पनि उनी आफ्नो स्वार्थका लागि जतातिर पनि ढल्किन सक्ने नेताका रुपमा चिनिन्छन् । आज मात्र बालकोटमा एमाले अध्यक्ष ओलीसँगको वार्तापछी हामी एकै ठाउँमा छौं, केही दिनमा निष्कर्षमा पुग्ने बताएका थिए ।

यसले पनि प्रष्ट हुन्छ अहिलेसम्म दुबै नेता निष्कर्षमा पुगेका छैनन् । केही दिनमा निष्कर्षमा नपुगे कांग्रेसले फ्याकेको कार्डले पनि काम गर्न सक्ने सम्भावना पनि रहने माओवादी एमालेकै नेताहरु बताउछन् । प्रधानमन्त्री प्रचण्ड आफ्नो अडानमा कायम रहनुमा उनलाई पार्टीबाट नै राष्ट्रपतिमा राष्ट्रिय सहमति हुनुपर्ने दबाब छ भने ओली पुर्व सहमतिकै कारण आफ्नो अडानमा छन् । उनी पुर्व सहमति नै कार्यान्वयन हुनुपर्ने र अहिलेको सरकारलाई कांग्रेसको समर्थन आवश्यक नरहेको बताउदै आइरहेका छन् ।