फिफा वरीयतामा नेपाली महिला फुटबल टोलीको ऐतिहासिक फड्को, पहिलोपटक ८७औँ स्थानमा

काठमाडौं । नेपाली महिला राष्ट्रिय फुटबल टोलीले अन्तर्राष्ट्रिय फुटबल महासंघ (फिफा) द्वारा सार्वजनिक गरिएको पछिल्लो वरीयतामा इतिहासकै उत्कृष्ट प्रदर्शन गर्दै ८७औँ स्थानमा उक्लिन सफल भएको छ।

यसअघि नेपालले सन् २०१७ मा ९१औँ स्थान हासिल गरेपछि त्यो नै सर्वश्रेष्ठ वरीयता मानिन्थ्यो। तर यसपटक १३ स्थानको फड्को मार्दै ८७औँ स्थानमा उक्लिनु नेपाली महिला फुटबलको लागि ऐतिहासिक उपलब्धि बनेको छ।

नेपालको यो फड्को पछाडि गत महिना सम्पन्न एएफसी महिला एसिया कप छनोटको उत्कृष्ट प्रदर्शन मुख्य कारण बनेको छ।

नेपालले समूह चरणमा शानदार खेल प्रदर्शन गर्दै लाओसलाई ९–० र श्रीलंकालाई ८–० को फराकिलो अन्तरले हरायो। तेस्रो खेलमा नेपालले उज्बेकिस्तानसँग ३–३ को बराबरी खेलेको थियो। सो खेलमा पेनाल्टी सुटआउटमा नेपाल ४–२ ले पराजित भएको थियो।

यी परिणामहरूले नेपालको फिफा अंकमा ठूलो सुधार ल्याएको हो। जितहरूमा गोलको उच्च अन्तर र उज्बेकिस्तानजस्तो तुलनात्मक बलियो टोलीसँगको बराबरीले नेपाललाई वरीयता अंकमा फाइदा पुर्‍याएको हो।

दक्षिण एशियामा नेपाल दोस्रो स्थानमा

फिफा वरीयता सूचीमा नेपाल दक्षिण एशियाली मुलुकहरूमा दोस्रो स्थानमा पर्छ।

• भारत ७ स्थान सुधार गर्दै ६३औँ स्थानमा रहेको छ।
• नेपाल दोस्रो स्थानमा रहँदा
• बंगलादेशले उल्लेखनीय २४ स्थान फड्को मार्दै १०४औँ स्थानमा पुगेको छ।
• पाकिस्तान १५४औँ,
• श्रीलंका १६१औँ,
• भुटान १६३औँ, र
• माल्दिभ्स १६५औँ स्थानमा छन्।

नेपाली महिला टोलीको यो ऐतिहासिक फड्कोले नेपाली खेल क्षेत्र र खेलप्रेमीहरूमा नयाँ ऊर्जा र उत्साह थपेको छ। लामो समयदेखि संघर्षरत महिला फुटबलमा अहिले जुन किसिमको सुधार देखिएको छ, त्यो भविष्यमा अझ उचाइमा पुग्न सक्ने सम्भावनाको संकेत हो।