रास्वपा छाडेपछि सुमना श्रेष्ठको कडा सन्देश: ‘प्रश्न दबाउने राजनीति लोकतन्त्रको अन्त्य हो’

काठमाडौं । राष्ट्रिय स्वतन्त्र पार्टी (रास्वपा) छाडेकी पूर्वनेतृ तथा पूर्वमन्त्री सुमना श्रेष्ठले सार्वजनिक अभिव्यक्तिमार्फत पार्टीभित्रको आन्तरिक लोकतन्त्र, प्रश्न गर्ने संस्कार र नेतृत्वको उत्तरदायित्वबारे तीखो टिप्पणी गरेकी छन्। पार्टीबाट बाहिरिँदा आफू अझ खरो, स्पष्ट र प्रतिबद्ध बनेर निस्किएको सन्देश दिँदै उनले व्यक्तिगत अवसरका लागि राजनीति नगरेको स्पष्ट पारेकी छन्।

श्रेष्ठले अवसर नपाएर रास्वपा छाडेको आरोपलाई अस्वीकार गर्दै आफू देशका युवाका लागि समान अवसर सुनिश्चित गर्न र नेपालीलाई नेपाली भएर बाँच्न सक्ने वातावरण निर्माणको एजेन्डासहित राजनीतिमा सक्रिय रहेको बताइन्। उनका अनुसार राजनीति पद, चिन्ह वा दलका लागि होइन, जनताको आवाजको प्रतिनिधित्वका लागि हुनुपर्छ।

पार्टीभित्र प्रश्न उठाउनेहरूलाई दबाउने, मिडिया ट्रायल गर्ने र साइबर बुलिङमार्फत चरित्र हत्या गर्ने प्रवृत्ति बढ्दै गएकोप्रति चिन्ता व्यक्त गर्दै श्रेष्ठले यस्तो अभ्यासले लोकतान्त्रिक मूल्य–मान्यतालाई कमजोर बनाउने चेतावनी दिइन्। “प्रश्न गर्न नपाइने, असहमति राख्न नसकिने संरचनाले लोकतन्त्रलाई समाप्त गर्छ,” उनले भनिन्।

हाल ‘नयाँ रास्वपा’ भित्र उठिरहेका प्रश्न र असन्तुष्टिलाई नेतृत्वले चुनौती होइन, सुधारको अवसरका रूपमा लिनुपर्ने धारणा पनि उनले राखेकी छन्। दल, चिन्ह र पद अस्थायी भए पनि जनताको आवाज बोकेर हिँड्नु नै राजनीतिको स्थायी कर्म भएको उनको भनाइ छ।

सोही सन्दर्भमा उनले राष्ट्रिय स्वतन्त्र पार्टीलाई ‘नयाँ रास्वपा’ भनेर नामाकरणसमेत गरेकी छन्। लोकतान्त्रिक मूल्य–मान्यता जोगिँदै नयाँ सम्भावनाहरू फल्ने–फुल्ने वातावरण बनोस् भन्ने शुभकामनासहित उनले आफ्नो राजनीतिक यात्रालाई निरन्तरता दिने संकेत पनि गरेकी छन्।