नगर प्रहरी प्रमुख राजुनाथ पाण्डेको निलम्बन यथावत् रहने, उच्च अदालत पाटनले रिट खारेज गर्‍यो

काठमाडौं । उच्च अदालत पाटनले काठमाडौं महानगरपालिका नगर प्रहरी बलका प्रमुख राजुनाथ पाण्डेको निलम्बन यथावत् रहने आदेश दिएको छ।

पाण्डेले आफूलाई निलम्बन गर्ने निर्णयविरुद्ध दायर गरेको रिट निवेदनमाथि बुधबार सुनुवाइ गर्दै अदालतले उनको माग खारेज गरेको हो। बुधबार न्यायाधीश दलकुमार खड्का र दीपक खनालको संयुक्त इजलासले रिट निवेदन खारेज गर्दै निलम्बन कायम रहने निर्णय सुनाएको हो।

पाण्डेलाई काठमाडौं महानगरका प्रमुख प्रशासकीय अधिकृत सरोज गुरागाईँले कार्यालय प्रवेशमा अवरोध गरेको र पदीय मर्यादाविपरीत आचरण गरेको भन्दै निलम्बन गरेका थिए।

सो निलम्बनविरुद्ध पाण्डे उच्च अदालत पाटन पुगेका थिए। प्रारम्भिक सुनुवाइका क्रममा अदालतले अन्तरिम आदेश जारी गरेपछि उनी अस्थायी रूपमा पुनः कार्यालयमा हाजिर भएका थिए।

तर अन्तिम सुनुवाइमा अदालतले गुरागाईँको निलम्बन निर्णयलाई वैधानिक ठहर गर्दै पाण्डेको रिट खारेज गरेको हो। यससँगै अब पाण्डेको निलम्बन यथावत् रहने भएको छ।

यस घटनाले काठमाडौं महानगरभित्र प्रशासनिक व्यवस्थापन र नगर प्रहरीको भूमिकाबारे फेरि बहस सुरु भएको छ।