पाकिस्तानमा डुङ्गा पल्टिँदा ४ को मृत्यु १६ बेपत्ता

चैत्र २१ ,इस्लामाबाद – पाकिस्तानको दक्षिणी नाउसाह्रो फेरोज जिल्लामा सोमबार बिहान डुङ्गा पल्टिँदा कम्तीमा चार जनाको मृत्यु भएको छ भने अन्य १६ जना हराइरहेका छन् । दक्षिणी सिन्ध प्रान्तको केती बागैन क्षेत्रमा गहुँबाली स्याहार्नका लागि जाँदै गरेका मजदुर चढेको डुङ्गा इन्दुस नदीमा दुर्घटना भएको हो ।

उद्धारकर्ताहरुले चार वटा शव निकालेका छन्, भने अरु १६ जनाको खोजी भइरहेको स्थानीय अधिकारीले जानकारी दिएका छन् । डुङ्गा दुर्घटनाको कारण अहिलेसम्म स्पष्ट हुनसकेको छैन । यस वर्ष इन्दुस नदीमा डुङ्गा दुर्घटना भएको यो दोस्रो पटक हो । यसअघि गत फेब्रुअरीको सुरुमा भएको दुर्घटनामा सात जनाको मृत्यु भएको थियो ।  इन्दुस नदीको किनारमा बस्ने बासिन्दाले प्रायःजसो डुङ्गाको प्रयोग गर्ने गर्दछन् । रासस