कांग्रेस विशेष महाधिवेशनः सभापतिमा गगन थापा एक्ला उम्मेदवार

काठमाडौं, ३० पुस । नेपाली कांग्रेसको विशेष महाधिवेशनअन्तर्गत नेतृत्व चयनका लागि हुन लागेको निर्वाचनमा मनोनयन दर्ताको समय सकिएको छ । निर्वाचन समितिका विश्वस्त स्रोतका अनुसार पार्टी सभापतिमा गगनकुमार थापाको मात्रै उम्मेदवारी दर्ता भएको छ ।

निर्वाचन समितिमा रहेका एक सदस्यले रिपोर्टर्स नेपालसँग कुरा गर्दै भने, “मनोनयन दर्ताको समय सकिएको छ । सभापतिमा गगनकुमार थापाको मात्रै उम्मेदवारी परेको छ । उहाँले अधिकृत वारेसनामामार्फत उम्मेदवारी दर्ता गराउनुभएको हो।”

निर्वाचन समितिले उम्मेदवारहरूको प्रारम्भिक नामावली दिउँसो १ बजे सार्वजनिक गर्ने तयारी गरेको छ । यद्यपि, हाल पार्टी सभापति शेरबहादुर देउवासहित संस्थापन पक्षका शीर्ष नेताहरूसँग आन्तरिक छलफल जारी रहेकाले त्यसको प्रतिकूल असर नपरोस् भन्ने उद्देश्यले उम्मेदवारहरूको नाम दिउँसो १ बजेसम्म गोप्य राख्ने निर्णय गरिएको जनाइएको छ ।

विशेष महाधिवेशनलाई कांग्रेसको भावी नेतृत्व र पार्टीको दिशानिर्देश तय गर्ने महत्त्वपूर्ण राजनीतिक घटनाका रूपमा हेरिएको छ । सभापतिमा गगन थापा एक्ला उम्मेदवार बनेसँगै उनी निर्विरोध चयन हुने सम्भावना बलियो देखिएको छ ।

अब दिउँसो सार्वजनिक हुने उम्मेदवारको औपचारिक सूची र त्यसपछिका प्रक्रिया कांग्रेसको आन्तरिक राजनीतिमा निर्णायक हुने अपेक्षा गरिएको छ ।