काठमाडौं–२ बाट युवा ब्यवसायी अनुप बोहराको स्वतन्त्र उम्मेदवारी घोषणा, संविधान संशोधन र राजनीतिक स्थायित्व मुख्य एजेन्डा

काठमाडौं । आगामी प्रतिनिधिसभा निर्वाचनका लागि काठमाडौं क्षेत्र नम्बर–२ बाट अनुप बोहराले स्वतन्त्र उम्मेदवारी दिने औपचारिक घोषणा गरेका छन्। शनिबार काठमाडौंमा आयोजित उम्मेदवारी घोषणा कार्यक्रममा बोल्दै बोहराले देशको वर्तमान राजनीतिक संरचना र निर्वाचन प्रणालीले स्थिर सरकार दिन नसकेको दाबी गर्दै स्वतन्त्र उम्मेदवारका रूपमा चुनावी मैदानमा उत्रिएको बताएका हुन्।

बोहराले संविधान संशोधन र निर्वाचन प्रणाली परिवर्तन नगरी देशले खोजेको राजनीतिक स्थायित्व सम्भव नहुने स्पष्ट धारणा राखे। ‘हाम्रो माग बिल्कुल स्पष्ट छ। जबसम्म संविधान संशोधन हुँदैन र निर्वाचन प्रणाली परिवर्तन हुँदैन, देशले चाहेको प्रत्यक्ष कार्यकारी नेतृत्व सम्भव छैन,’ उनले भने, ‘देशलाई पाँच वर्ष टिक्ने प्रधानमन्त्री चाहिएको छ, तर अहिलेको संविधानले त्यो अनुमति दिँदैन।’

उनले बारम्बार सरकार परिवर्तन हुने अवस्थाले विकास, सुशासन र आर्थिक स्थायित्वमा गम्भीर असर पारेको उल्लेख गरे। अहिलेको प्रणालीकै कारण अल्पकालीन सरकार बन्ने र नीति–कार्यक्रम कार्यान्वयन हुन नपाउँदै सरकार ढल्ने प्रवृत्ति मौलाएको उनको आरोप छ।

कार्यक्रममा बोहराले युवापुस्ताको आवाज वर्तमान व्यवस्थाले समेट्न नसकेको बताए। विशेषगरी जेन–जी (Gen Z) पुस्ताका रोजगारी, शिक्षा, प्रविधि, उद्यमशीलता र सहभागिताका मागहरूलाई राज्यले बेवास्ता गरेको उनको भनाइ छ। ‘यो संविधानले जेनजीका मागहरू पूरा गर्दैन,’ उनले भने, ‘युवाको ऊर्जा र सोचलाई राज्य सञ्चालनमा समेट्न सकिएन भने देश अझ पछि पर्छ।’

राजनीतिमा सीमित कार्यकर्ता र नेतृत्व मात्र सक्रिय रहेको उल्लेख गर्दै बोहराले आम नागरिकलाई सचेत र सक्रिय हुन आह्वान गरे। ‘राजनीतिमा १०–२० लाख कार्यकर्ता मात्र होमिएका छन्, तर दुई करोड जनताले यो यथार्थ बुझ्न जरुरी छ,’ उनले भने। लोकतन्त्र बलियो बनाउन नागरिकको प्रत्यक्ष सहभागिता आवश्यक रहेको उनको जोड थियो।

बोहराले आफ्नो उम्मेदवारी कुनै दलविरुद्ध मात्र नभई प्रणालीगत परिवर्तनका लागि भएको स्पष्ट पारे। संविधान संशोधन, युवाका मागको सम्बोधन, राजनीतिक स्थिरता, सुशासन र दिगो विकासलाई आफ्नो मुख्य चुनावी एजेन्डा बनाउने उनले बताए। साथै, अस्थिरता सिर्जना गर्ने पुराना र नयाँ दुवै खाले शक्तिलाई पराजित गर्दै वास्तविक परिवर्तन चाहने शक्तिलाई जिताउनुपर्ने उनको धारणा छ।

काठमाडौं–२ को चुनावी प्रतिस्पर्धामा बोहराको उम्मेदवारीलाई चासोका साथ हेरिएको छ। यसअघि २०७९ सालको प्रतिनिधिसभा निर्वाचनमा पनि उनले स्वतन्त्र उम्मेदवारी दिएका थिए। उक्त निर्वाचनमा राष्ट्रिय स्वतन्त्र पार्टीकी सोविता गौतम निर्वाचित भएकी थिइन्। यसपटक दलबाट निर्वाचित सांसदले अपेक्षित काम गर्न नसकेको जनगुनासो बढेकाले जनताको आग्रहमा पुनः उम्मेदवार बनेको बोहराले दाबी गरे।