रवि लामिछाने–बालेन शाह एकता नजिक, वैकल्पिक राजनीतिक शक्तिको नयाँ मोर्चा तयारी

काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौँ महानगरपालिकाका मेयर बालेन शाहबीच राजनीतिक एकताका लागि सहमति नजिक पुगेको छ। दुवै पक्षका वार्ता टोलीले एकताको प्रारम्भिक खाका तयार पारिसकेका छन् भने शनिबार औपचारिक घोषणा गर्ने तयारी तीव्र बनाइएको स्रोतले जनाएको छ।

पछिल्ला केही हप्तायता रवि र बालेनबीच चरणबद्ध रूपमा गोप्य संवाद हुँदै आएको थियो। यस क्रममा काठमाडौंको कमलपोखरीस्थित रास्वपाका केन्द्रीय सदस्य असिम शाहको म्युजिक कम्पनी तथा ललितपुरको ज्वागलस्थित बालेन शाहका प्रमुख सल्लाहकार कुमार व्यञ्जनकारको निवासमा महत्त्वपूर्ण भेटवार्ता भएको बताइएको छ। ती भेटघाटमा दुवै नेतासहित सीमित विश्वासपात्र मात्र सहभागी थिए।

वार्तामा वैकल्पिक राजनीतिक शक्तिलाई संस्थागत गर्दै युवापुस्तासहित जेन–जी मतदातालाई एउटै राजनीतिक प्लेटफर्ममा उभ्याउने रणनीतिमा केन्द्रित छलफल भएको स्रोतको दाबी छ। पुराना र परम्परागत राजनीतिक दलहरूले मुलुकलाई दीर्घकालीन रूपान्तरण दिन नसकेको निष्कर्षसहित नयाँ राजनीतिक ध्रुव निर्माण गर्ने विषयमा सहमति जुट्दै गएको बताइएको छ।

स्रोतका अनुसार सम्भावित सहकार्यको खाकामा सुशासन, भ्रष्टाचारविरुद्ध शून्य सहनशीलता, पारदर्शी प्रशासन, स्थानीय तहको सशक्तीकरण, रोजगारी सिर्जना, शिक्षा र स्वास्थ्य क्षेत्रमा संरचनागत सुधार जस्ता एजेन्डालाई प्राथमिकतामा राखिएको छ। साथै, राज्य सञ्चालनमा प्रविधिको प्रयोग, नीति निर्माणमा युवाको प्रत्यक्ष सहभागिता र पुरानो राजनीतिक संस्कृतिको अन्त्य गर्ने प्रतिबद्धता पनि साझा एजेन्डाका रूपमा समेटिने तयारी छ।

एकताबारे अन्तिम मोडालिटीमा छलफल जारी रहेको र नेतृत्व संरचना, चुनावी सहकार्य तथा भविष्यको राजनीतिक दिशा स्पष्ट पार्ने काम भइरहेको स्रोतले जनाएको छ। शनिबार संयुक्त पत्रकार सम्मेलनमार्फत सहकार्य वा एकतासम्बन्धी औपचारिक घोषणा गर्ने सम्भावना उच्च रहेको बताइन्छ।

यदि रवि लामिछाने र बालेन शाहबीचको सहकार्य औपचारिक रूपमा सार्वजनिक भयो भने यसले नेपाली राजनीतिमा नयाँ तरंग ल्याउने, विशेषगरी शहरी क्षेत्र र युवामाझ वैकल्पिक राजनीतिप्रति आकर्षण बढाउने विश्लेषकहरूको भनाइ छ। यसलाई परम्परागत दलहरूप्रति बढ्दो असन्तुष्टिको प्रतिफलका रूपमा पनि हेरिएको छ।