नेपाली सेनाद्वारा तिब्बतको सिमाना लार्केभञ्ज्याङ जोड्ने सडक निर्माण सुरु

चैत २० ,गोरखा। नेपाली सेनाले बेनिघाट–आरुघाट हुँदै तिब्बतको सिमाना लार्केभञ्ज्याङ जोड्ने सडकको नयाँ ट्र्याक खोल्ने काम सुरु गरेको छ । थुमीगाउँको अर्मलामा शिविर स्थापना गरी सेनाले सडक निर्माणको काम गरेको हो । ७५ जना सेनाको टोली सडक निर्माणमा खटिएको छ । सेनाका इन्जिनियर निशान्त पण्डितकाअनुसार हावाडाँडादेखि लापुभीरसम्म रहेको चट्टान फुटाउन बम ‘ब्लास्ट’का लागि प्वाल बनाउने काम भइरहेको छ ।

सेनाले हावाडाँडादेखि उहियाको तातोपानीसम्म १६ किलोमिटर सडक निर्माणका लागि अध्ययनसमेत गरिसकेको जनाएको छ । धादिङको बेनीघाटदेखि लार्केभञ्ज्याङसम्मको सडक करिब १८३ किमि दुरीमध्ये सेनाले आरुघाट–लार्केभञ्ज्याङखन्ड करिब १२१ किमि सडकको नयाँ ट्र्याक खोल्ने काम गर्दैछ ।

बेनीघाट–हावाडाँडाखन्ड ६२ कि.मि सडक सडक विभागले निर्माण गरेको थियो । हावाडाँडादेखि लापुभीर हुँदै नयाँ ट्र्याक खोल्न रु दुई करोड ५० लाख रुपैयाँ बजेट निकासा भएको छ । माछाखोलामा अर्को शिविर राखेर केही दिनपछि उक्त खन्डमा नयाँ ट्र्याक खोल्ने काम पनि सुरु गर्ने इन्जिनियर पण्डितले बताए । सडक निर्माण हुने स्थल मनास्लु पदमार्ग रहेकाले पदमार्गको विकल्पमा अर्को बाटो खोल्ने तयारी पनि भइरहेको जनाइएको छ । रासस