कुनै दलले भाग नलिएपनि स्थानीय तहको चुनाव हुन्छ : नेता वर्षमान पुन

चैत १७ ,काठमाडौं – सत्तारुढ दल नेकपा माओवादी केन्द्रका नेता वर्षमान पुनले कुनै दलले भाग नलिएपनि स्थानीय तहको निर्वाचन नरोकिने दाबी गर्नुभएको छ । शुक्रबार रिपोर्टर्स क्लबमा भएको साक्षात्कारमा नेता पुनले भन्नुभयो, ‘निर्वाचनको प्रक्रिया धेरै अघि बढिसक्यो, अब निर्वाचन हुँदैन कि भनेर कसैले पनि शंका गर्नुहुँदैन, अब रोकिने र नहुने भन्ने हुँदैन्, कारणवश कुनै दल छुटे उनीहरुलाई क्षतिपूर्तिसहित प्रदेश र संघीय निर्वाचनमा समेटिनेछ ।’  संविधान कार्यान्वयनको लागि पनि निर्वाचन आवश्यक रहेको बताउँदै उहाँले भन्नुभयो, ‘यो सरकारको पहिलो प्राथमिकता भनेको नै संविधान कार्यान्वयन गर्ने हो, त्यसको लागि ०७४ माघ ७ गतेभित्रै तीन तहकै निर्वाचन गर्नुपर्छ, यसको लागि सरकार अघि बढिसकेको छ ।’

उहाँले मधेसी मोर्चा लगायतका असन्तुष्ट पक्षहरुको माग सम्बोधन गर्न संविधान संशोधन गर्ने र निर्वाचनको प्रक्रिया पनि सँगसँगै अघि बढाउने सरकारको तयारी रहेको जनाउनुभयो । उहाँले घोषित मितिमै स्थानीय तहको निर्वाचन हुने समेत विश्वास दिलाउनुभयो ।  ‘५० जिल्लाको मतपत्र छपाईको काम सम्पन्न भैसकेको छ, ७५ हजार म्यादी प्रहरी भर्ना भैसकेका छन्, प्रशासनिक एव्म सूरक्षा तयारी भैरहेको छ’ स्थानीय तहको निर्वाचन कुनैपनि हालतमा नसर्ने जिकिर गर्दै पुनले भन्नुभयो, ‘सरकार अब पछि हट्दैन्, चुनाव हुन्छ, हुन्छ ।’ पुनले प्रधानमन्त्री पुष्पकमल दाहाल प्रचण्ड चीन जानु अघि नै असन्तुष्ट मधेसी मोर्चा र प्रमुख प्रतिपक्षी दल नेकपा एमालेसँग एक किसिमको अनौपचारिक समझदारी बनिसकेको समेत दाबी गर्नुभयो ।

उहाँले सिमांकनबाहेकका विषयहरुलाई चुनाव अघि नै संशोधन गरेर मोर्चालाई पनि चुनावमा लिएर जाने सरकारको तयारी रहेको र यसमा मोर्चा सकारात्मक देखिएको विश्वास दिलाउनुभयो ।  उहाँले मधेसी मोर्चाले पनि भित्रभित्रै चुनावको तयारी गरिरहेको दाबी गर्नुभयो । पुनले थपे, ‘मधेसी मोर्चाले पनि भित्रभित्रै चुनावको तयारी गरिरहेको छ, आफ्नो प्रभाव रहेको जिल्लामा कहीँ पनि दल दर्ता गराउन छुटाएको छैन, बरु कांग्रेसको केही ठाउँमा छुटेको छ ।’  फरक प्रसंगमा उहाँले निर्वाचन आयोगले राप्रपाको विधानबाट हिन्दूराष्ट्र र राजतन्त्र हटाइदिएकोमा यसले राप्रपालाई नै फाईदा पुगेको तर्क गर्नुभयो । उहाँले भन्नुभयो, ‘निर्वाचन आयोगको निर्णयले राप्रपालाई त फाइदा नै पुगेको छ, चर्चामा आयो, जनतामा जानको लागि चर्चा चाहिन्थ्यो, निर्वाचन आयोगले नै एकैचोटि चर्चामा ल्याउने काम गर्यो ।’