वर्तमान सरकारले केही पनि काम गर्न सकेको छैन – बरिष्ठ नेता झलनाथ खनाल

चैत्र १७ ,चितवन । पूर्व प्रधानमन्त्री एवं नेकपा एमालेका बरिष्ठ नेता झलनाथ खनालले वर्तमान सरकारले केही काम गर्न नसकेको आरोप लगाउनु भएको छ । उहाँले सरकारले निर्वाचन स्थगित गर्न कोसिस गरिरहेको जिकिर गर्दै निर्वाचन गर्ने आँट सरकारले गर्नुपर्ने बताउनुभयो । बिहीबार चितवनको भरतपुरमा सञ्चारकर्मीसंग कुरा गर्दै नेता खनालले स्थानीय निकायको निर्वाचन तोकिएको मितिमा नभए देशमा उथलपुथल हुने जिकिर पनि गर्नुभयो । उहाँले निर्धारित मितिमै निर्वाचन गर्न आग्रह गर्दै निर्वाचन समयमा हुन नदिन षड्यन्त्र चलिरहेको पनि बताउनुभयो । आम जनता र नेकपा एमालेको दवावमा निर्वाचन मिति घोषणा भएको भन्दै कुनै पनि वहानामा रोक्न खोजिए मान्य नहुने बताउनुभयो ।

वरिष्ठ नेता खनालले मधेश मधेशी मोर्चाको वपौती नभएको भन्दै प्रदेश नं. २ मा सबैभन्दा बलियो पार्टी नेकपा एमाले रहेको दावी गर्नुभयो । तराईमा फेरी एमालेले कार्यक्रम गर्ने भन्दै उहाँले यस अघि मधेशी मोर्चाको गैरजिम्मेवारीपूर्ण क्रियाकलापका कारण सप्तरी घटना भएको बताउनुभयो । नेता खनालले मधेशमा मधेशी मोर्चाले जनता भड्काउने काम गरेको भन्दै सबैलाई थाहा हुने गरी कोही कसैबाट मधेशी मोर्चा परिचालित भएको आरोप पसनि लगानुभयो ।