खरिदबिक्री गर्दै आएको आरोपमा प्रहरीले २० लाख भन्दा बढी भारुसहित चार जनालाई पक्राउ

चैत्र ३, लामो समयदेखि भारु रुपैयाँ खरिदबिक्री गर्दै आएको आरोपमा प्रहरीले २० लाख बढी भारुसहित चार जनालाई पक्राउ गरेको छ ।नेपालगन्ज धम्बोझीका राजेश कुम्हार, नेपालगन्जकै सतिषकुमार राय, बाँके कटकुईयाका अहमद अन्सारी र त्यहाँकै नुरअहमद खाँ पक्राउ परेका हुन् । नेपालगन्जस्थित भेरी अन्चल प्रहरी कार्यालयबाट खटिएको बिशेष ब्युरो टोलीले उनीहरुलाई पक्राउ गरेको हो । उनीहरुसंग २० लाख ४६ हजार भारु र ७ लाख नेपाली रुपैया बरामद भएको छ ।

अञ्चल प्रहरी कार्यालय प्रमुख बरिष्ठ प्रहरी उपरीक्षक (एसएसपी) महेशबिक्रम शाहले एक साताको लगातर निगरानीपछि भारु कारोबारीलाई पक्राउ गर्न सफल भएको बताए । उनीहरु लामो समयदेखि कारोबार गर्दै आएको उनको दाबी छ । कटकुइयाका अन्सारी र खाँले भारु रुपैयाँ किनेर ल्याउने र कुम्हार र रायले बिक्री गरेको आरोप प्रहरीको छ ।