अन्ततः सरकारले दियो पृथ्वीजयन्तीमा सार्वजनिक बिदा

२ चैत, काठमाडौं । २०६३ को राजनीतिक परिवर्तनसँगै खोसिएको पृथ्वीजयन्तीको राष्ट्रिय हैसियत लामो आन्दोलन र धेरैको दवावपछि सरकारले पुर्नस्थापित गरेको छ । मंगलबार प्रकाशित राजपत्रमा पृथ्वीजयन्तीलाई सार्वजनिक बिदाको सूचीमा सामेल गरिएको छ । तर उक्त अवसरलाई राष्ट्रिय एकता दिवसका रुपमा मनाइनेबारे केही खोलिएको छैन् ।
गृहमन्त्री बिमलेन्द्र निधिले सोमबारको मन्त्रिपरिषद्को बैठकमा पृथ्वीजयन्तीलाई सामेल नगरी २०७४ सालको सार्वजनिक छुट्टीको सूची पेश गरेपछि धेरै मन्त्रीहरुले यसको विरोध गरेका थिए । पृथ्वीजयन्तीमा छुट्टी नदिएसम्म सार्वजनिक छुट्टीको प्रस्ताव अनुमोदन नगर्ने अडान लिएपछि थाती रहेको थियो ।

मन्त्रिपरिषद्ले अन्ततः पृथ्वीजयन्तीको बिदालाई सार्वजनिक बिदाको सूचीमा समावेश गरी त्यसको सूचना राजपत्रमा प्रकाशित गरेको छ ।