Mega Bank
भर्खरै

नोबेल साहित्य पुरस्कार इसिगुरोलाई


 October 5, 2017     सेतो खबर

स्टकहोम (स्वीडेन), असोज १९ । जापानीमुलका बेलायती साहित्यकार काजुओ इसिगुरोलाई सन् २०१७ को साहित्यतर्फको नोबेल पुरस्कार दिइने भएको नोबेल पुरस्कार छनोट गर्ने स्वीडीस एकेडेमीले बिहीबार जनाएको छ ।

पुरस्कार घोषणा गर्ने स्वीडीस एकेडेमीले ती उपन्यासकारको प्रशंसा गर्दै उनले ‘आफ्ना बेजोड भावनात्मक शक्ति भएका उपन्यासमा संसारसँगको सम्बन्धबारे हाम्रो भ्रमपूर्ण भावको गहिराइ पत्ता लगाएको’ उल्लेख गरेको छ ।

सन् १९८२ मा ‘अ पेल भ्यू अफ हिल्स’ नामक पुस्तकबाट पूर्णकालीन लेखन सुरु गरेका साहित्यकार इसिगुरोका कृतिमा स्मृति, समय र स्वैरकल्पनासम्बन्धित विषयवस्तु रहने गरेको पाइन्छ ।

पुरस्कार छनोट समितिकाअनुसार इसिगुरोका लेखनमा शान्त अभिव्यक्ति तथा सांगीतिक प्रभाव रहेको पाइन्छ ।

सन् १९५४ को नोभेम्बर ८ मा जापानको नागासाकी सहरमा जन्मेका इसिगुरो पाँच वर्षको उमेरमा परिवारसहित बेलायत गएका थिए ।

उनले अंग्रेजी तथा दर्शनशास्त्रमा केन्ट विश्वविद्यालयबाट स्नातक गरेका छन् ।

उनका सबैभन्दा चर्चित उपन्यासहरु ‘द रिमेन्स अफ द डे’ र ‘नेभर लेट मि गो’मा आधारित रहेर चलचित्र बनाइएका छन् ।

६२ वर्षीय लेखकले आफू नोबेल पुरस्कार विजेता घोषित हुँदा अत्यन्तै खुसी बनेकोे बताए । उनले जम्मा ८ ओटा पुस्तक लेखेका छन् ।

इस्ट एङलिया विश्वविद्यालयमा सिर्जनात्मक लेखनको अध्ययन गरेका उनले ११ लाख अमेरिकी डलर बराबरको पुरस्कार प्राप्त गर्नेछन् । रासस/सिन्ह्वा

Ime Inside



Ime Inside